Hajiji miampai mogigiyon Pulou Gaya id ababayan Kemara Kasih Ramadan doid SK Pulou Gaya.
KOTA KINABALU: Koporintaan Pogun kiatag montok momolumis Pulou Gaya om posili dilo’ iso’ mantad pongimbayat ponombuluyan Sabah, ka di Boyoon Montiri, Datuk Seri Haji Hajiji Haji Noor.
“Pomusarahan dilo’ alaid no do haro om Koporintaan Pogun noondo masaan mamalan popoundaliu mogigiyon i po nogi’ mogigiyon nokoiyonon id Pulou Gaya kumaa tana’ tagayo,” ka disio.
Pulou Gaya, ka disio, kiharo kosiwatan montok silihon pongimbayat ponombuluyan di osonong nga’ kinohoroon setinggan id pulou dilo’ amu’ kosudong montok palan dilo’.
“Pulou Gaya kiharo koiyonon di ogingo id susuyan kahandaman tokou om poinsumpak ilo’ do kikiro no limo minit pamanahan sumakai bot mantad Longkod Pogun. Gunoon tokou kososonong hal diti,” ka disio id ababayan Kembara Kasih Ramadan id Sikul Kabansaan (SK) Pulou Gaya, do hiti, di tadau baino’.
Boyoon Montiri minoboros, Upis Parlimen Putatan id siriba’ Kumoduo Boyoon Montiri, Datuk Ir. Shahelmey Yahya nga’ kipalan nogi’ montok monuridong Kolinik Kolidasan id pulou dilo’.
“Nunu i oponsol mogigiyon do hiti tumilombus monimporon pisompuruan, koumoligan om koburision,” ka disio.
Hajiji i tinanud di ADUN Petagas, Datuk Awang Ahmad Shah Awang Sahari pinapatahak nogi’ ponguhupan yuran kosikulan kuminaa di 70 susumikul mantad Upis ADUN Petagas.
Talib dilo’, i Hajiji miampai dii Awang Ahmad Sah, Shahelmey, Montiri Sains, Tiknologi om Inovasi, Datuk Dr. Mohd. Arifin Mohd. Arif om Potunud Yayasan Sabah, Dato’ Sri Ghulamhaidar Khan Bahadar pinapatahak toluod Aidilfitri kumaa mogigiyon.
