KOTA KINABALU: Kopokionuan montok tokop wuros, waig sanitasi om ‘test kit’ Covid-19 nokoinsawat nosusuhut kinoinsawaton kes Covid-19 id Sabah, nga’ kogonop o sitok om aiso’ kopomolian koronob.
Luguan Upisor Pogirotkuasa’ Pogun, Komontirian Pidagangan Suang Pogun om Kos Pamamasi (KPDN) Pogun Sabah, Zulfamy Mat Udi minoboros, KPDN Sabah nokoilo di koyuon kes Covid-19 i pinoruput do minsawat tikid tadau id Sabah.
“Tumanud di kopoikidan om padagangan, tokop wuros, waig sanitasi nogi’ test kit Covid-19 id pogun diti noilaan do haro padagangon id pidagangan i potuu id farmasi toi pasar agayo id gatang di omurah om poinpatut.
“Gisom noondo, KPDN Sabah aiso’ naramit nunu-nunu kumpilin toi ruputan kohondot kinoinsawaton gatang om kokurion sitok babarang dilo’ id pidagangan.
“Pipiro premis farmasi di pinorisa’ nga’ pinopoilo do kopokionuan kumaa test kit Covid-19 naantakan kinoingkawason do kopokionuan, poingkuro po, sitok kakal haro om korungod.
“Farmasi nga’ toririmo nogi’ momoruhang sitok pangaba’ mantad montok manampung kopokionuan i pikikiro do koinsawat.
“Koyuon id pidagangan nga’ aiso’ kinaantakan kopomolian oronob mantad moomoguno,” ka disio id kointalangan di tadau konihab.
Minoboros isio, puru pogirotkuasa KPDN Sabah toririmo haro id koiyonon ngaawi’ i nosili rubpuon tulun ginumuan do momooboli miagal pasar ginumuan, pasar tani om pasar agayo montok popoindalan pomorisaan om pogintongan tikid tadau montok babarang ngaawi’ kogunoon kaampai tokop wuros, waig sanistasi nogi’ test kit Covid-19 sabaagi laang montok papaadang gatang pidagangan nogi’ papatantu’ kosukupon pangaba’ id pidagangan, asanang maganu om padagangon id gatang di poinpatut.
Ka disio, nombo-nombo mongindapu’ i popowonsoi kasalaan pogonuan laang id siriba’ Akta Panamangan Gatang om Anti Pencatutan (AKHAP) 2011 om Akta Panamangan Pangaba’ (AKB) 1961, aanu mongontok penalti miagal posusuhut:
Akta Panamangan Gatang om Anti Pencatutan (AKHAP) 2011
i. Kasalaan papadagang babarang gatang pointamong katalib gatang ‘maksimum’:
a) Sosongulun; aanu dandaondo kuut gisom RM100,000 toi jiil amu’ katalib tolu toun toi goduduo dilo’ toi kompaun gisom RM50,000; om
b) Komponi; aanu dandaon gisom RM500,000 toi kompaun gisom RM250,000;
ii. Kasalaan amu’ kopodokot tanda gatang toi sinuratan gatang kumaa babarang dagangon.
a) Sosongulun; aanu dandaon do kuut gisom RM50,000 om jiil 2 toun toi goduduo dilo’ toi kompaun gisom RM25,000; om
b) Komponi; aanu dandaon gisom RM100,000 toi kompaun gisom RM50,000.
Akta Panamangan Pangaba’ (AKB) 1961
i. Kasalaan mongindapu’ popolisok babarang pitamangan om manansala’ babarang pitamangan.
a) Sosongulun; aanu mamadanda’ amu’ katalib iso’ (1) riong ringgit toi jiil amu’ katalib tolu (3) toun toi goduduo dilo’; om
b) Komponi; danda’ amu’ katalib duo (2) riong ringgit.
Ka di Zulfamy, KPDN toririmo maganu nunu-nunu kointalangan nogi’ ruputan kopohompit sala’ pogoyuon mongingindapu’ toi kokurion pangaba’ babarang pitamangan.
Moomoguno kaanu papatahak ruputan maya’ pawaya’an poruputan miagal posusuhut:
a) Whatsapp 019-279 4317 / 019-848 8000; b) Portal Aduan: e-aduan.kpdn.gov.my;
c) Call Centre 1-800-886-800;
d) Emel: e-aduan@kpdn.gov.my ;
e) Ez ADU KPDN;
f) Tumingan sondiri’ kumaa Upis KPDN id dodoros;
g) Longkod Ponuhuan Pogirotkuasa’an (Enforcement Command Centre): 03 – 8882 6088 / 6245.
