Christoper Mandut, Luguan Exco Komulakan PBS.
KOTA KINABALU: Habar karait susuyan songulun Molohingon Mongingia’ id Sikul Kabansaan (SK) Ulu Ansuan doid watas Telupid i nasansagan mongingiyon id sitor sikul lobi tolu toun pointonod poingkaraja’ id sikul dilo’ nakaramit nogi’ kopomodulianan di Exco Komulakan Parti Bersatu Sabah (PBS).
Luguan Exco Komulakan PBS, Dr. Christopher Mandut, minoboros, oondos kopio isio nokorongou kinotoboion di sigu George Odol minonimbaba’ kaantaban om pinopoindalan tonggungan montok no do kosindakon balajaran id sikul disio.
Nga’, id timpu di miagal, minongunsub isio do Komontirian Balajaran Malaysia monborisid om manahak koposuulan di kogugunoon ngaawi’ tongo’ mongingia’ id Sabah.
“Atagon ku o koporintaan kopomoruhang kopoobian fizikal montok sikul ngaawi’ id Sabah, kaampai no kousinan sipoot sikul doid Sabah.
Ka disio, hal dilo’ montok papatantu’ kobolingkahangan miagal dilo’ amu’ kotilombus gisom kosili iso’ kososolugan toi ‘trend’ pogitutungkusan.
“Binosoroho’ no lobi no 60 tokou nokopomorinta’ sondiri, om koyuon miagal diti kakal naantakan, dadamot do asasaru’ tokou korongou boros lalansanon montok mongingkawas sinonong balajaran pogun,” ka disio pinoposotol.
Tumanud disio, susuyan miagal notoguang di sigu George dilo’ no i wookon nosili kointalangan do Sabah kakal noiduanan id kinoinwoguan, lolobi no id sunduk koburuon balajaran kaampai no kogogonopan sikul id watas dilo’.
“Orohian tokou kokito lobi kogumu’ inggisaman monginsonong, popomogot sikul om kopongundaran kogogonopan id Sabah sabaagi wookon posuulon koporintaan, suai ko’ moningkanan kumaa sinonong koponudukan om pinsingilaan,” ka disio.
Kohondot dilo’, otumbayaan isio ogumu’ inggisaman ‘turun padang’ lalansanon nokoiyonon lolobi no id koiyonon Poonsokid Sabah, potilombus dino monguhup manalasai kobolingkahangan kapaampai balajaran nokoiyonon.
Kalansanan nogi’ disio iti kosili ponontudukan kumaa koporintaan mooi do lobi mintong pointopot di koyuyuon balajaran id Sabah, om sumikap maganu laang id koponginsonongan kogogonopan siku nogi’ popoobi’ kousinan di korungod montok kogunoon tongo’ mongingia’ id kiyonon dilo’.
