Hajiji nonuan kopointalangan kokomoi kopoburuan resort di Ponorikohon Sinyi Realty Inc, Ken Chou.
KOTA KINABALU: Songinan resort dounpuawang kitopong 5 ‘bintang’ i pikikiro kapagawi’ balanja’ RM1 bilion maan turidongo’ id Melinsung, Papar om potilombus dino koponguhup pomorunan ponompuanan om surupukaraja’ Sabah.
Id koobian koporintaan pogun, Boyoon Montiri Datuk Seri Haji Hajiji Haji Noor minonongkounsikou kumaa Sinyi Group om tambalut mikungsi dau, InterContinental Hotels Group (IHG) and Resorts tu’ minomili’ Sabah montok ponuridongan resort.
“Kootusan dokoyu montok mangapu’ id harata’ tana’ diti kopokito ralan di lobi kagayo okon nopo ko’ monuridong kogogonopan montok monuang pisuk di tutumombului nga nogi’ minomonsoi kopoopuan kosudong doid Sabah.
“I nopo bobos oponsol montok Sabah nga’ kopoopuan miagal dilo’ nga’ kopongimbulai nogi’ do waya’ opilipat montok mongingkawas ikonomi,” ka disio id ababayan mamabak tana’ doid koiyonon projik dilo’ do hiti di tadau biano’.
Hajiji (kaapat, gibang) pinopowonsoi gimik mamabak tana’ miampai di monunuridong Tinimungan Sinyi, Chou Chun (koturu’, wanan) om tombului naalap suai.
Boyoon Montiri minoboros, longkod podtungongisan popouyu 450 pisuk dilo’ okon nopo ko’ kopongimbulai lobi 500 kosiwatan pakarajaan nga nogi’ kouhup kumaa kosunion siktor ponombuluyan.
“Mokimokito nogi’ yahai do kopoopuan miagal dilo’ adangon di waya’ dilo’ kumaa pongindopuan nokoiyonon, suai ko’ mintong waya’ dilo’ i kapaampai mogigiyon nokoiyonon montok manahak koundaran kumaa diolo’,” ka disio.
Minoboros isio, Tinimungan Sinyi om IHG Hotels Group and Resorts minomili’ kinoiyonon di kosudong montok monuridong harata’ tana’ dilo’ sabab koiyonon dilo’ pikikiro koburu’ osikap mantad pamansaian pomotingan Pengalat-Papar om monginsonong ralan Lok Kawi.
Id sunduk pangaba’ waig, Hajiji minoboros, do pinoimpuun disio projik monginsonong Loji Pongusapan Waig Kogopon kigatang RM379 riong tolu tulan nakatalib montok momoruhang kopolobusan kumaa 80 riong liter sangadau (MLD) montok watas Papar.
“Iti koponoibau kokurion waig id koibutan Tisan Kotonobon Sabah, momorikot montok koundaran kikiro 160,000 moomoguno id Putatan, Kinarut, Lokawi om pososorili’ dilo’.
“Projik diti kopongingkawas kopulion pangaba’ waig montok manampung okon nopo ko’ pongindopuan aanu poburuon do hiti nga nogi’ montok kopokionuan pomorunan, kosuul no Terminal Tumau om Gas Sabah (SOGIT) om Presint Agro-Pomorunan Sabah (SAIP) id siriba’ Korikod Koburuon Sabah gisom 2040,” ak disio.
Minoboros isio, Luguan Montiri pikikiro popoimpuun Projik Hidroelektrik kigatan bobilion ringgit id Ulu Padas, Tenom do kolimpuunon tulan tiso’. Projik dilo’ pikikiro opongo do 2027 kopongimbulai kuasa’ 180 megawatt (MW) montok manampung pomogunaan timpu anaru.
Koporintaan pogun masaan nogi’ monorisid kopikikiraan monuridong wokok montok mongimbulai 6,000 riong MLD waig montok manampung kopokionuan id suang timpu 80 gisom 100 toun dumontol, ka disio i minoboros iti kaampai no Kaiduan toi Papar sabaagi wookon mantad panalasaian timpu anaru kumaa kobolingkahangan kokurion waig.
Hajiji (poungkakat, tanga’) suminasi’ pinialanan dokumen pialatan di Ponorikohon Sinyi Realty Inc, Ken Chou (poindikau, gibang) om i Potunud Karaja’ IHG Hotels and Resorts Asia Tenggara om Korea, Rajit Sukumaran (poindikau, wanan).
“Kohompit ponombuluyan, amu’ ku nuru’ moboros anaru di pongimbayat i haro id Sabah. Ula’ no monotk moboros do Sabah alaid no do nosili ririkoton i ihum-ihumon do tutumombului doid poliliput pomogunan. Noondo soira’ notonduli’ koyuyuon kumaa pomorunan ponombuluyan katalib Covid-19, kinorikatan tutumombului nokotilombus nokoinsawat kuminaa 1.9 riong minimpuun wulan Koiso’ gisom Kosiam touon diti.
“Miampai Sabah momorikot 2.2 riong korikotan tutumombului montok 2023, ounsikou oku sabab babaino’ diti nokosigampot tokou 86 pihatus mantad di rikoton. Tumanud naangayan Sabah pointonod siam wulan di nakatalib, Sabah id waya’an di kohunung monotk mamagampot rikoton di pinatatap montok toun diti. 2023,” ka disio.
Minoboros isio, pinomoruhangan InterContinental Resort iso’ po kawagu kinoburuon osonong montok Sabah, i nokokito no do pipiro hotel noturidong, mantad hotel rontob 5 bintang gisom bajet miampai korumposon 26,822 pisuk i mongiikiro kosuangon lobi kogumu’ tutumombului kumaa Sabah.
“Otumbayaan oku pi’ilangan id pialatan tinimungan Sinyi om IHG Hotels Group and Resorts, songinan komponi monompuan pomogunan, kopogowit siktor surupukaraja’ kumaa rontob lobi kasawat. Tonggungan dokoyu kopiongoi di palan koburuon Hontolon Sabah Maju Jaya dahai montok papatantu’ dahai kopowonsoi di bobos osonong montok Sabah,” ka disio.
Hajijij minoboros, Sabah magalap papaapu’ montok mintong kosiwatan kopoopuan om pongindopuan okon nopo ko’ id siktor ponombuluyan nga nogi’ id siktor suai, miagal pamansaian takanon ‘hiliran’, miampai pomogunaan konsep Ikonomi Obulou (Ekonomi Biru) i kokoimbulai ilo’ nopo nga’ pomorunaan po’ompus do intodonon rahat.
“Susuai kaampai no siktor ginoris miagal solar, ginaras tongus, hidro om tiknologi kopoopian, i wookon, miagal tumau om gas om kopolobusan produk mantad tiknologi otomou om produk hiliran ‘biojisim’,” ka disio.
Boyoon Montiri minomohulit do Sabah poinsodia’ monorisid atag pomorunan wagu mantad mangangapu’ di kohunung.
