William Majimbon
KOTA KINABALU: Songulun lansanon Parti Bersatu Sabah (PBS) minamaramit om kosokodung pongunsuban mooi do pohoroon karalano’ waya’an otimpas montok kopongupalaian nakalaid MyKad id koiyonon labus kakadayan Sabah nga’ pinoposorou do iti kiguno porikoton montok nopo tangaanak aiso’ dokumen molohing mamasok Malaysia om okon ko’ modidikot aiso’ kasagaan aiso’ dokumen i poingiyon id Sabah.
Puru Kounsol Akawas PBS, Datuk William Majimbon minoboros, isio do poinpoopori mamaramit om monokodung karalano’ waya’an otimpas maya’ koonuan koporojistoran manau-panau i pinaatag di Puru Parlimen Kota Belud Isnaraissah Munirah Majilis mantad Parti Warisan montok ababayan gompoton Koupisan Porojistoran Pogun (JPN) id koiyonon labus kakadayan Sabah.
“Poingkuro po, haro pipiro kotongoban ku om atag potilombus karait karalano’ diti.
“Montok ponimpuunan, mositi’ tokou popisuai id pialatan “mongungupalai nakalaid MyKad toi tanak aiso’ dokumen molohing mamasok Malaysia” om “modidikit aiso’ kasagaan aiso’ dokumen i poingiyon id Sabah”. Tinimungan kumoiso’ nopo nga’ tulun i kiharo kopotutan i amu’ songkuro kinonosipan i potuu mantad sunduk sosio-ikonomi toi koyuon sabab kohimpogongan geografi. Poingkuro po, tinimungan di kumoduo nopo tulun i suminuang Sabah maya’ ralan aiso’ kasagaan om amu’ minananud karalano’ undang-undang di apatut om kopomogunaan imigrisin id Sabah.
“Pisuayan id pialatan duo tinimungan diti nopo kiguno montok papatantu’ kooturan di kohunung posodiaon kumaa diolo’ i mantad Sabah om amu’ manahak koundaran kumaa diolo’[ i poingiyon do aiso’ kasagaan id Sabah. Nga’, Warisan amu’ nakaanu pinopointalang hal diti.
“Kotongoban kumoiso’ ku nopo kohondot karalano’ di pinaatag dilo’ nga’ kopohimogonan dokumen maya’ Kuut Mamasok Pogun Sabah.
“Padaahan montok kotongoban diti kaampai no katalangan do kopohimogonan miagal dilo’ nopo nga’ aiso’ kasagaan undang-undang. Nosili nindikohon undang-undang do kuasa’ montok popoimagon dokumen di poinggompit do koporojistoran kad kointutunan nopo nga’ id labus kaganaan kuasa’ Kuut Mamasok Pogun i pinosodia’ id siriba’ Enakmen Mahkamah Anak Negeri 1992. Iti amu’ miagal di kuasa’ Kuut Mamasok Pogun montok popoimagon upalai sabaagi “Mamasok Pogun” id siriba’ Seksyen 3 Ordinan Tafsiran (Takrif Anak Negeri) 1952.
“Poingkuro po, paatagon ku do okon nopo ilo’ ko’ kohunung do timpu nga nogi’ kiguno montok undang-undang simbanan do manahak kuasa’ kumaa Kuut Mamasok Pogun id kopohimogonan kopongupalaian MyKad. Iti kaampai no waya’ sawat om minsiriba[‘ om mongongobi’ kuasa’ Kuut Mamasok Pogun kumaa molohingon kampung id tikid kampung doid Sabah. Kosokodung poinponu’ oku laang diti sabab otumbayaan oku do molohingon kampung kosili bohogian kikuasa’ i bobos kosudong montok popoimagon nantadon om kinoiyonon di mongungupalai id koiyonon labus kakadayan Sabah.
“Suai ko’ osimbanan undang-undang montok manahak kuasa’ miagal dilo’, kopohimogonan molohingon kampung nopo nga’ aiso’ kapasagaan om amu’ ookunan di pipiro kotinanan koporintaan om komontirian. Nga’, iti nopo kaantakan di naantakan hinombo mogigiyon nokoiyonon Sabah nolim kopotutan pinotomod diolo’ id koonuan pongusapan pongubatan om kosiwatan balajaran sundung pia miampai surat kinopohimogonan mantad molohingon kampung. Osonong daa, kopohimogonan dilo’ apatut do kiharo kookunan pomorintaan om kiwaya’,” ka disio id iso’ kopointalangan di tadau baino’.
William minoboros, kotongoban koduo disio kumaa karalano’ di pinaatag nopo nga’ kinotulidon dilo’.
Minoboros isio, maan kopio nopo nga’ haro kaantakan di pointopot do kapanansalaan sabab kiguno iloon do okon ko’ oinsanan watas toi kampung id Sabah kiharo kogumuan mogigiyon Tulun Sandad toi ko’ tulun Sabah nokoiyonon.
Haro koiyonon poingusuk id Sabah hinombo do setinggan modidikot songkosuayan aiso’ kasagaan nookunan maya’ pomorintaan sabaagi “kampung”, ka disio, i minongoput do poinsotol pinapaatag do kiguno haro karalano’ pomoruhang montok mangadang di karalano’ i pinaatag montok papatantu’ dilo’ amu’ pasalaon guno toi pogonuan kosiwatan di pongumbalan aiso’ tinonggungan do papasaga’ di amu’ pasagaon.
William po nogi’ Lansanon Kopoburuan Mogigiyon (PPM) Inanam minoboros, kotongoban kotolu disio kapaampai totondos Warisan do haro ogumu paganakan Sabahan aiso’ dokumen id Inanam i amu’ apatut om aiso’ nimpohon.
“Sabaagi PPM N.18 Inanam, nosili laang okodou unit ku montok mongulud om monimung Luguan Mamasok Pogun om Molohingon Kampung di kosisili id Inanam do mongintutun paganakan aiso’ dokumen diti doid kampung diolo’.
“Sundung do poingusuk, noilaan dahai do kogumuan hal aiso’ dokumentasi toi koporojistoran MyKad nakalaid diti okon ko’ hal osigampot, pomorintaan toi komosikinan nga’ hal pisasawaan milongot id pialatan mogigiyon nokoiyonon om modidikot songkosuayan aiso’ kasagaan. Mantad dilo’, hal poinggompit kinotopoton pinisasawaan diolo’ koponginlaid do koporojistoran MyKad montok taanak mantad no do pinisasawaan dilo’.
“Hal kopohompit mikoruhang di nokopitongkiad toi nokopiada’ nga’ nokoowit nogi’ kosusaon poposodia’ koinsanai dokumen di gunoon montok koporojistoran tanak sabab songulun mantad di tina’ toi tama’ minongiduan paganakan. Hiti no o kopohimogonan do Kuut Mamasok Pogun do gunoon,” ka disio pinopointalang.
William minoboros, goduduo koporintaan pogun om Pisompuruan kiguno maganu ponginsomokan di lobi pointomod om kiwaya’ kohondot hal aiso’ dokumen toi koposojistoran MyKad nakalaid id Sabah.
“Sapatut daa haro karalano’ di lobi kosonong om kiwaya’ montok monoibau kobolingkahangan sinakagon aiso’ dokumen diti.
“Sakag mogigiyon Sabah sandad kaampai no Mamasok Pogun Sabah niduan do kopotutan om kosuulon diolo’ sabaagi mogigiyon Malaysia sasabab no do kinolomogon katatapan diti. Katalib 60 toun kinopomorintaan sondiri, kiguno tokou popowonsoi hal di lobi kosonong montok mogigiyon Sabah,” ka disio pinoposotol.
