KOTA KINABALU: Komontirian Padsakaian pinapahabar ruputan ogonop Ruputan Ponoriukan Tohuri Kinoligagnaan Tawan Kapal Sabah Air Nomad N-22B 9M-ATZ i naantakan di ko’ 6tw Ko’onom 1976 (“Double-Six Tragedy”) do noondo diti aanu do maganu mantad laman web pinotomod Komontirian id::
Https://www.mot.gov.my/en/aviation/reports/n22b-nomad toi,
https://www.mot.gov.my/en/AAIB%20Statistic%20%20Accident%20Report%20Document/LAPORAN%20AKHIR%20SIASATAN%20KEMALANGAN%20UDARA%20NAHAS%20PESAWAT%20SABAH%20AIR%20MODEL%20GAF%20N-22B%20NOMAD%20PADA%206%20JUN%201976.pdf
Montiri dilo’, Anthony Loke minoboros, nosusuhut kinapahabaran Luguan Montiri, Datuk Seri Anwar Ibrahim di ko 5tw Kaapat 2023 karait Ruputan Ponoriukan Tohuri Kinoligagnaan Tawan Kapal Sabah Air Nomad N-22B 9M-ATZ i naantakan di ko’ 6tw Ko’onom 1976 (“Double-Six Tragedy”), pinahabar disio koindalano’ montok mongidu’ ‘klasifikasi’ (menyahklasifikasi) ruputan dilo’ nopongo id ko’ 6tw Kaapat 2023.
“Sabaagi Montiri Padsakaian i kitonggungan kohondot pontuludan ginumuan om ponoriukan kinoligaganan tawan, pinosompini’ ku kawagu ruputan ponoriukan tohuri idlo’ sabaagi dokumen poingukan miampai momoguno kuasa’ i pinatahak id siriba’ Seksyen 2C Akta Rahsia Rasmi 1972.
“Montok kopoilaan, ruputan tohuri kinoligaganan tawan Nomad N22B 9M-ATZ nopongo di ko 25tw Koiso’ 1977 om talib dilo’ pinawalad kumaa Nuludan Montiri di tulan Kotolu 1977.
“Sundung ingkaa, asil ponoriukan ruputan dilo’ amu’ insan pahabaro’.
“Mantad dilo’, solinaid somok 47 toun puru paganakan di nongogompitan amu’ nokoilo kointalangan om padaahan mantad kinoligaganan tawan dilo’,” ka disio id iso’ kopointalangan di tadau baino’.
Soginumu’ 11 niawa nokorundun id kinoligaganan Double-Six, kaampai nuludan momuruan totuo Koporintaan Pogun Sabah di ontok dilo’ miagal id siriba’:
I. Tun Fuad Stephens – Boyoon Montiri Sabah
II. Datuk Peter Joinod Mojuntin – Montiri Pomuwalaian om Koporintaan Koiyonon Sabah
III. Datuk Chong Thien Vun – Montiri Piromutan om Karaja’ Agayo Sabah
IV. Datuk Salleh Sulong – Montiri Kousinan Sabah
V. Datuk Darius Binion – Monguhup Montiri kumaa Kumoduo Boyoon Montiri Sabah
VI. Datuk Wahid Peter Andau – Monunurat Pointatap Komontirian Kousinan Sabah
VII. Dr Syed Hussein Wafa – Potunud Unit Mamalan Ikonomi Sabah
VIII. Ishak Atan – Monunurat Olisok kumaa Montiri Kousinan Malaysia
IX. Koperal Said Mohammad – Bodigad Sondiri’ kumaa Boyoon Montiri Sabah
X. Johari Fuad Stephens – Tanak di Boyoon Montiri Sabah
XI. Gandhi J Nathan – Popotulud Kapal 9M-FTZ
“Monongkosiou oku kumaa toinsanan paganakan om waris di nongogompitan i nokorundun.
“Id nayatan Komontirian Padsakaian, tikid kinaantakan pontudulan mositi’ no do soriukon miampai pointulid om poinpuli montok papasarabak kotumbayaan sompomogunan kohondot kogorisan Malaysia id koponuridongan songinan pomorunan pontuludan di kitonggungan om monumboyo’ sitandod bobos akawas.
Komontirian Padsakaian pointopot monotk monilombus katatapan poingukab diti,” ka di Loke.
