Riduan ontok minambahas id nayatan puruankuasa’ Komontirian Kopotundaan Koonduan, Paganakan om Mogigiyon id Pitimungan Dewan Rakyat doid Kuala Lumpur, di song konihab.
KOTA KINABALU: Ogumu’ rayat omosikin id Sabah kosuul no id Tenom kakal do amu’ nokoulud doid Sistem Bank Data Komosikinan Nasional (eKasih), ka di Puru Parlimen Tenom, Riduan Rubin.
Ka disio, nakaramit isio kumpilin mantad mongungupalai i kosudong do asansagan yolo’ mogindad botoun-toun montok maganu kolulusan upalai eKasih.
Tumanud disio, lobi kapakaus nopo nga’ wookon di upalai diolo’ nada’an soira’ nokopongindad botoun-toun linaid om aiso’ padaahan di pinatahak kinapagada’an do upalai diti.
“Yoho’ sondiri’ nga’ minindahu’ pinapaharo kotombuluyan om pinirubaan miampai diolo’ diti (mongungupalai eKasih) om nokoilo do koposion diolo’ osusa’ om momoguno ponguhupan mnatad koporintaan do osisikap.
“Kohondot dilo’, oponsol montok diolo’ (rayat mosikin di kosudong) kaanu kolulusan mantad komontirian poinggompit sabab nung aramit upalai diolo’, tantu’ no do kapasanang ilo’ do pitorinaan diolo’ id kopongupalaian ponguhupan suai miagal do walai id siriba’ Ababayan Pomuwalaian Rayat Omosikin (PPRT), ponguhupan kotundunan om pongusapan id walai pongubatan,” ka disio ontok minambahas id nayatan puruankuasa’ Komontirian Kopotundaan Koonduan, Paganakan om Mogigiyon doid Pitimungan Dewan Rakyat id Kuala Lumpur, di song konihab.
Riduan minoboros, id pipiro kinotombuluyan karaja’ disio id watas Tenom, nokosiwat isio kuminakap tulun nokoidu pogun. I nopo kopotongob nga’ i nokoidu’ pogun napatai sabab no do aiso’ kosukupan montok mambayar pongusapan id walai pongubatan do mongubat tomporuruol awagat i popuriman dau.
“Tohuri nopo, asansagan yau popologos monoguang koruolon gisom no do id koompokon surupu,” ka disio.
Kohondot dilo’, minongunsub isio sistem pangkalan data eKasih do insonongan mooi do kopongintutun koitalangan di lobi ‘mikro’ mooi do lobi kopunong gisom kaanu momuntuk tulun i ototopot momoguno ponguhupan do mongilag kotoliban.
Tumanud disio, ponguludan kawagu sistem eKasih nga’ kiguno powonsoiyon mooi do lobi osompuru nogi’ koponginsonong karalano’ kopolulusan.
Kipomusarahan isio, tikid nayatan momumuruan lolobi no Molohingon Kampung om Puruankuasa’ Kopotundaan om Koumoligan Kampung (JPKK) kiguno pogompiton miampai aparagat montok mongilo tulun i kosudong montok posuraton id sistem eKasih mooi do aiso’ tulun di momoguno i otoliban om koindisan.
“Kalansanan ku mooi do kosudongan kolulusan di poinharo mantad sorisidon kawagu do bohogian kitonggungan sabab ogumu’ mongungupalai i kosudong nga’ nolim kopotutan diolo’ mooi do kaadangon sosial di poinpatut aanu papadalin kumaa diolo’,” ka disio kawagu.
Minokianu nogi’ i Riduan do Komontirian Kopotundaan Koonduan, Paganakan om Mogigiyon monguhup tongo’ tina’ osongulun sabab yolo’ nopo nga’ wookon mantad tinimungan mogigiyon i opidsalaan di kosimbanon ikonomi om kos kosukupan koposion nogi’ kiharo mogisusuai pogumbalan id sunduk pakarajaan, nindopuan om kotundunan.
