Dr Joachim Gunsalam
RANAU: Soginumu’ 12 paganakan id Kampung Lembah Permai pinokianu do mundaliu id koiyonon di lobi oumolig nosusuhut kinaantakan tana’ notuhan di kaawagu diti.
“Nung koyuon amu’ atampasi nga’ pokionuon yolo’ do mundaliu kumaa koiyonon di lobi koumolig do osisikap,” ka di Kumoduo Luguan Montiri po nogi’ Puru Lintuhun Koundangan Pogun (ADUN) Kundasang, Datuk Seri Dr. Joahcim Gunsalam.
Kundasang nopo nga’ iso’ koiyonon tana’ tidong om oruhaian do kaantakan tana’ otuhan nogi’ toririmo kotoguang koinsuron tana’.
Di kaawagu diti, iso’ kinaantakan tana’ nokurus toi tana’ notuhan (aliran puing) naantakan id kampung dilo’ nokopohompit 12 paganakan i noumpadanan kopio.
Naamot dilo’, mogigiyon di suai sinuhu’ do mingat-ingat.
Dr. Joachim po nogi’ Montiri Koporintaan Koiyonon om Pomuwalaian minamason koinsanai mogigiyon mooi do toririmo manahak kosokodungan kumaa bohogian kikuasa’ do soiraira’ timpu.
Minonongkounsikou nogi’ isio kumaa koinsanai kotinanan i pinonorikohon di Upisor Watas Ranau sabaagi Ponorikohon Puruankuasa’ Longkod Kapanamangan Karaja’ om Kadaaton (PKOB), Jumain Abdul Ghani mantad sokodung om karaja’ di pinapanau.
Naamot dilo’, i Jumain minoboros, kinaantakan aliran puing nopo dilo’ nga’ mantad no do rasam asapou id tisan otidong i kiharo tana’ om watu nogoto.
Pinointalang disio, lapisan i toririmo kotoguang koguraon tana’ diti koowit do babak watu mitonggoi tana’ kumaa liang di otungab mimpuun mantad tana’ otuhan tisan koluyungon toi ‘sedimen’ oruhai oowit i kakal id kawas do kinoiyonon.
Mantad dilo’, ka disio, nosusuhut kopogintongan osompuru miampai di koinsanai puru Puruankuasa’ PKOB, mogigiyon id koiyonon naantakan pokionuon toririmo sumosodia’ om mundaliu nung kiguno.
Pinggisaman mogihum koiyonon wagu montok poiyanan mogigiyon kampung di noumpadanan nga’ masaan nogi’ do inggisaman, ka disio.
Suai ko ilo’, koporuputan mantad lansanon kampung kohompit do koyuon maso-maso kampung kiguno pootodon kumaa PKOB tikid limo (5) jam.
Jumain minonongkounsikou kumaa puru Angkatan Pertanahan Malaysia (APM) om Koupisan Bomba om Monumpasi (JBP) mantad tonggungan di pinatahak, om nogi’ lumansan mooi do mogigiyon Kampung Lembah Permai monokosung id kopoturundusan karaja’ kopoundolihan.
Mogigiyon nga’ kiguno momoromut do PKOB kosuul no APM.
