RANAU: Tinimungan Exco Wiramuda Parti Solidariti Tanah Airku (STAR) minongunsub do koporintaan monimbang kopongundaran nogi’ kapamawaalan Balai Pulis om Balai Bombaom Manampasi (BBP) id koiyonon podtungongisan Kundasang.
Luguan dilo’, Kong Soon Choi minoboros, boogian disio mintong poinwagat hal dilo’ om minaganu ponontudukan mantad kinaantakan tana’ napayang id Batang Kali di kaawagu diti i nokoporundun hinapadan niawa nogi’ nokoponinduol pipiro tulun suai.
“Unsubon ku koporintaan Perpaduan id sahau Komontirian Suang Pogun (KDN) om Komontirian Kopotundaan Koporintaan Koiyonon do sumikap mogowit ababayan kopongundaran om kapamawaalan Balai Pulis om BBP id Kakadayan Kundasang sabab koiyonon diti nosili rubpuon tutumombului poliliput pomogunan,” ka disio pinoposotol.
Kong po nogi’ Kumoduo Luguan Komulakan Gabungan Rakyat Sabah (GRS) pinoposotol, kososodiaan puru koumoligan oponsol kopio id koiyonon tana’ tidong Kundasang lolobi no soira’ koyuon tawan i amu’atantu’ do pototohuri diti.
Pinointalang disio,nung lumansan korikotan puru koumoligan mantad Kakadayan Ranau i osodu’ mantad koiyonon totombuluyon Kundasang, tantu’ no do maganu timpu di alaid nung aantakan hal agagou.
Ka wagu di Kong, koyuon do Balai Pulis Kundasang do noondo diti id Kakadayan Kundasang kiguno simbanan mooi do katampung ginumu’ puru pulis di korungod id koiyonon dilo’.
“Okito ku sondiri koyuon linimput Balai Pulis Kundasang i momoguno no do kontena. Pikikiro doti’ do komontirian kaanu poposuul koponuridongan songinan linimput di lobi koposimbayan om kosudong kaampai no oinggonopan do walai sitaf,” ka disio.
Minoboros isio dilo’ soira’ rinubaan katalib pinopoimagon Pinialaan Cabaran Motorcross id Kampung Kinapulidan doros hiti di tadau Ko’onom katatalib.
Kinopogintongan id pososorili’ kakadayan Kundasang nokokito nogi do Balai Pulis Kundasang i poinsumpak id koiyonon Lintuhun Mogigiyon Kounsol Watas Ranau (MDR) om surupu karaja’ bomba om manampasi tumalahan do BBP Watas Ranau.
