Hajiji Haji Noor: Lihuai hal kapaampai pulitik tu’ noondo timpu dati’ kumaraja’ montok rayat om pogun.
KOTA KINABALU: Koporintaan Pogun poposodia’ pongusin soginumu’ RM54.04 riong id Bajet 2023 Sabah montok koponguhupan om kapanahakan kumaa sikul ngaawi’ om kopoburuan tongo’ tinan kougamaan okon Islam id Sabah do toun tiiso’, ka di Boyoon Montiri Datuk Seri Hajiji Haji Noor.
Ka disio, ponguhupan om kapanahakan dilo’ nokoinsawat soginumu’ RM7.05 riong nung piadangon di toun 2022.
“Sabaagi koporintaan i opoduli’ om aadang, monilombus tokou koponguhupan om poruntukan kumaa Tinan-Tinan Kougamaan Okon Islam i nogi’ kapanahak koundaran kumaa gereja ngaawi’ id pogun diti.
Dr. Jeffrey (tanga’), Montiri Koporintaan Koiyonon om Pomuwalaian Sabah po nogi’ Montiri Kousinan II, Datuk Seri Panglima Masidi Manjun (kaapat, wanan) guminambar pongingitanan miampai tangaanak om talap tapantang di nokotindapou.
“Iti no tanda’ om kokitanan do Koporintaan Pogun otootopot om osonong ginawo id koponguhupan oinsanan nayatan mogigiyon amu’ momuntuk tinaru om ugama’,” ka disio id Ababayan Kinopoimpuunan Kapamaramaian KK Christmas 2022 id Padang Merdeka, do hiti, di konihab.
Teks boboroson disio binasa’ di Kumoduo Boyoon Montiri II po nogi’ Montiri Pomutanaman om Ponginsadaan, Datuk Seri Dr. Jeffrey Kitingan.
I Boyoon Montiri minongunsub toinsanan rayat do tumilombus miampai do koporintaan id kopotontuan koburuon sosiol aanu kotilombus poinggompi’ om oingkawasan montok kasasanangan om koundaran toinsanan.
“Lihuai hal i kapaampai pulitik sabab noondo nopo nga’ timpu tokou do kumaraja’ montok rayat om pogun. I nopo oponsol, sokodung om ponguhupan mantad rayat koponguhup kalantaion kumaa koinsanai katatapan om ababayan i masaan tokou poindalanon id sahau Rikoton Sabah Maju Jaya (SMJ),” ka di Hajiji.
Ka disio, pisompuruan rayat, piuludan tinaru om pogipapantangan doid kiugama’ di ogirot id pogun diti mositi’ no do tilombuson montok koundaran sinakagon noondo om dumontol.
Tumanud disio, nunu nopo laang i kopongumpadan pisompuruan rayat om ginirot koporintaan mositi no do ilagon mooi do ababayan kopotundaan i napalan montok popoburu’ po do ikonomi pogun diti aanu monigampot.
Minoboros i Hajiji, sunduan pisompuruan, pogitimbangan om sopipantang id nayatan rayat Sabah i orukut tinaru, sinakagon om ugama’ alaid no do noguno rayat pogun diti.
“Nogi’ id tikid karamaian, mamaramai tokou miampai amu’ monompini’ tinaru om ugama’. Kohondot dilo’, mimang oku rayat id pogun diti do oinsanan popoindisan pisuayan om moningkanan do koyuon i koposompuru om okon ko’ kopongurias sompipi’ rayat,” ka disio.
I Boyoon Montiri minoboros, koporintaan pogun mongunsikou om mamaramit osonong tonggungan nogi’ inggisaman Dewan Bandaraya Kota Kinabalu (DBKK) om Kounsol Gereja-Gereja Sabah tu’ nakalantoi pinapaanjur karamaian KK Christmas Ko-17 miampai rayat id watas Kota Kinabalu.
Minongunsikou nogi’ isio do kotobian mamaramai Tadau Krismas om Toun Wagu 2023 kumaa oinsanan rayat Sabah.
