KOTA KINABALU: Koporintaan Pogun pinoposodia’ soginumu’ RM157.58 riong kumaa Komotirian Kopotundaan Mogigiyon om Kasasanangan Rayat om koupisan id sahau dau montok papatantu’ konosipan rayat oobian do po’ompus.
Boyoon Montiri, Datuk Seri Hajiji Haji Noor minoboros, mantad ginumu’ dilo’, RM50.51 riong poikidon kumaa komontirian diti montok pabalanjaan kopoindalanan om montok monilombus kapapanahan Ababayan Ponguhupan Sosial Sikul miampai kinoingkawason poruntukan kuminaa RM24.55 riong.
Ababayan diti kapanahak koundaran kuma soginumu’ 289,347 tulun susumikul id 1,075 tinan sikul osiriba’, ka disio kawagu.
“Koupisan Surupukaraja’ Kotundunan Am pinosodiaan soginumu’ RM107.43 riong do toun 2023, i wookon montok monilombus projik kapamansaian Kompleks Bersepadu Tulun Suai Kohimboguian (OKU) om Tulun Nolohing, nogi’ kapamansaian linimput Taman Didikan Kanak-Kanak Kurang Upaya Sandakan, om Kompleks Pingludaan OKU id Watas Sandakan.
“Suai ko ilo’, montok monilombus kapanahakan ponguhupan kumaa tinimungan kikobolingkahangan kosuul no OKU, tulun nolohing, tanak yatim om ‘ibu tunggal’ nogi’ ponguhupan ginumuan id poliliput pogun diti, koporintaan nakaakun popoingkawas poruntukan kumaa RM76.29 riong do toun 2023. Soginumu’ 24.781 tulun akramit koundaran id sahau ponguhupan diti.
“Longkod Kopoburuan Tanak-anak (PPKK) nopo nga’ Ababayan Kopotundaan Mogigiyon i kiwaya’ akawas. Gisom noondo, haro soginumu’ 35 tinan PPKK om soginumu’ 1,170 tulun tanak-anak di poinrojistor id longkod ngaawi diti. Ontok toun 2023, okporintaan pogun monilombus ababayan diti miampai mongukab 2 tinan PPKK wagu id Kampung Tambisan, Tungku om Kampung Mapat, Pitas,” ka di Hajiji po nogi’ Montiri Kousinan ontok pinapawalad Bajet Pogun Sabah 2023 id Lintuhun Koundangang Pogun (DUN) Sabah do hiti id tadau Kolimo.
Kopotundaan koonduan, komulakan om sipoot
Minoboros i Hajiji, koporintaan pogun opoduli’ nogi’ kopio om papatantu’ tongo’ koonuan kaanu kosiwatan om koundaran di miadang.
Kohondot dilo’ montok papagaras tongo’ ababayan kopotundaan koonduan ka disio, soginumu’ RM5.83 riong pinosodia’ kumaa Koupisan Hal Koonduan Sabah montok pamalanja’ mogisusuai ababayan kopomuruanan om kopotundaan koonduan.
“Kogogonopan pangalasan mikro kumaa koonduan maan tilombuso’ miampai poruntukan soginumu’ RM10 riong i patahakon kumaa Yayasan Usaha Maju (YUM),” ka disio.
