KOTA KINABALU: Koporintaan kiangkab do papatantu’ kopotundaan watas di aadang montok mongingkikip pisuayan kopotundaan id pialatan koiyonon kakadayan om kakadayan okoro’ (pekan) id poliliput Sabah.
Boyoon Montiri, Datuk Seri Hajiji Haji Noor minoboros, iti powonsoiyon maya’ koposotolan di apat posunduran osuulilo’ nopo nga’ Poposimban Kapatahakan Surupukaraja’ Bohogian Kikuasa’ Koiyonon (PBT), Popoinggirot om Kotilombuson Kopotundaan Siktor Pomuwalaian, Pamalanan Kopotundaan Guno Tana’ di Po’ompus om Oulud, om Popoinggirot Karaja om Tonggungan Kuut Tanak Pogun.
“Mantad dilo’, do toun tiso’, koporintaan pogun pinoposodia’ soginumu’ RM204 riong kumaa Komontirian Koporintaan Koiyonon om Pomuwalaian (KKTP) montok tuduan kopoindalanan om monilombus projik poinharo mantad, suai ko’ popoindalna mogisusuai projik wagu miagal do monginsonong pasar ginumuan, koiyonon pitomuan om sinusulap id Kakadayan Beaufort, Membakut, Weston om Keningau; Momonsoi ‘Sea Wall’ id Sandakan; Taman Tasik Kakadayan Beaufort; nogi’ Koiyonon Pomunsohan Rinomos id Kuala Penyu om Kinabatangan.
“KKTP nga’ monilombus nogi’ do projik kifasa Jeti Wagu Kota Kinabalu miampai poruntukan soginumu’ RM22.5 riong do toun 2023 montok manahak kosimbayanan kumaa tongo’ mongingindapu’ om mogigiyon ginumuan id watas kakadayan tagayo.
“Kapamansaian jeti diti pikikiro opongo poinponu’ do toun 2024,” ka disio ontok pinapawalad Bajet Pogun Sabah 2023 id Lintuhun Koundangan Pogun (DUN) Sabah do hiti id tadau Kolimo.
Suai ko ilo’, ka di Hajiji, Koporintaan Pogun monilombus kapatahakan geran om poruntukan kopotundaan soginumu’ RM36.2 riong kumaa Dewan Kakadayan Agayo Kota Kinabalu montok popoinggirot po do koponguludan om kopotundaan id watas Kakadyaan agayo Kota Kinabalu sabaagi longkod pogun.
“Montok mongingkawas kasasanangan rayat, toun tiso’, KKTP maya’ Kotinanan Pomuwalaian om Kopotundaan Kakadayan (LPPB) monguhup tinimungan kinindopuan osiriba’ om gogonsuhatan sumanganu walai di osimbayan maya’ projik kapamawalaan pomuwalaian ginumuan ogoosan sumanganu soginumu’ 175 unit id Kemabong om Melalap id Tenom, Sukau id Kinabatangan om Watas Beluran.
“LPPB nga’ pointopot nogi’ monilombus ababayan kopotundaan Kakadayan Wagu Kalabakan, Tongod, Merotai om nogi’ Sungai Melayu Sebatik i kosili do Kakadayan Piwolitan i koporomut do Sabah, Malaysia om Indonesia.
“Montok papatantu’ kotundunan om adat koubasanan Tanak Mamasok Pogun i poingiyon id labus kakadayan kotilombus ogompi’, koporintaan monilombus projik kapamansaian Kuut Tanak Mamasok Pogun Tamparuli, Sook, Paitan om Pagalungan,” ka disio.
