Dr. Jeffrey Kitingan
KENINGAU: Sabah lumansan do haro o katatapan kohondot di kopokionuan montok popoguli’ kopotutan dau id sahau koporintaan pisogiaan i buruanon di Luguan Montiri, Datuk Seri Anwar Ibarhim i wagu siliho’.
Kumoduo Boyoon Montiri Sabah, Datuk Seri Dr. Jeffrey Kitingan minoboros, bobos oponsol do wookon nopo nga’ kopotutan kousinan.
“Kotutun oku kopio di Luguan Montiri wagu om isio kotutun doho’ kaampai no kopokionuan dahai.
“Mantad dilo’, kalansanan ku miampai pisokodungan (pogun om Pisompuruan) i haro dati’ do noondo, kokito tokou asil di lobi kosonong kopohompit di kopokionuan Sabah om Sarawak,” ka disio kumaa magaganu habar katalib pinopoimagon ponutuban ababayan Rizab Biosfera Banjaran Crocker id Bingkor do hiti, di tadau baino’.
Hinulit disio do wookon kopotutan kousinan i inggisaman do Sabah nopo nga’ kopogulian 40 pihatus asil oborisi’ i naanu mantad pogun diti do koporintaan Pisompuruan om 10 pihatus sukai kopoudaran kumaa petroleum.
Dr. Jeffrey i po nogi’ Kumoduo Ponorikohon Gabungan Rakyat Sabah (GRS), minomohulit do Sabah nakaanu RM120 riong (mantad sukai kopongudaran om eksais) tikid toun dadamot do apatut nopo daa ilo’ nga’ karamit 10 pihatus mantad duti kopongudaran di asil petroleum i pikikiro kosigampot kikiro RM10 bilion.
“Mantad dilo’, Sabah sapatut kaanu kikiro RM1 bilion (tikid toun),” ka disio.
Koporintaan GRS-BN Sabah suminompuru koporintaan pisogiaan Anwar.
Id ababayan dilo’, Dr. Jeffrey id boboroson disio pinoposotol koponsolon pomogunaan konsep kopotundaan poompus id inggisaman papabantug sosio-ikonomi mogigiyon.
Iso’ mantad ralan ka disio, nopo nga’ miampai poposili ababayan poinggompit pomutanaman om ponginsadaan miampai ‘inovatif’ sabaagi asil ponombuluyan.
“Iti no kosimbanon ‘paradigma’ i pounsubon ku do poinponu’,” ka disio.
Kopihondot dilo’, nunsub disio koponorinaan watas do papatantu’ kopotundaan Ponombuluyan ‘Lestari’ Bingkor aanu poindalanon id suang timpu 2023-2029.
“Palan dilo’ mositi’ manahak koposotolan di koponondulian gompi’ sandad posorili’ om gatang koubasanan mogigiyon tinaru nokoiyonon nogi’ popounsub agro-ponombuluyan,” ka disio.
Pinosotol nogi’ disio o kopomogunaan montok manahak koposotolan kumaa kopotundaan om kopointutunan ponombuluyan mimpau mogigiyon om asil pinalabus dilo’.
Watas ponondulian gompi’ Rizab Biosfera Banjaran Crocker (CRBR) kiginayo kikiro 350,000 hektar nokoulud id sahau ‘Manusia dan Biosfera’, Kotinanan Balajaran, Saintifik om Koubasanan Kotinanan Tinaru-Tinaru Misompuru (UNESCO) pointonod turu’ toun di nakatalib.
Watas dilo’ kopuli do siam watas ilo’ nopo nga’ Kota Kinabalu, Penampang, Papar, Beaufort, Tuaran, Keningau, Tambunan, Ranau om Tenom.
CRBR mongunsub do koponondulian gompi’ om kopotundaan miampai amu’ kapanahak waya’kumaa koponondulian gompi’ biodiversiti om surupukaraja’ ekosistem sandad posorili’, lolobi no intodonon biodiversiti om pangaba’ waig oborisi.
Gisom wulan Koonom toun diti, haro 727 rizab biosfera id 134 pomogunan.
Nokotindapou nogi’ Kumoduo Potunud Taman-Taman Sabah, Ludi Apin, Upisor Watas Keningau, Henry Idol, ADUN Bingkor, Datuk Robert Tawik om i Dr. Hans Dencker Thulstrup mantad UNESCO, Paris.
