Io’ Hajiji dii Abang Johari
KOTA KINABALU: Koporintaan Pogun Gabungan Rakyat Sabah-Barisan Nasional (GRS-BN) om Gabungan Parti Sarawak (GPS) miupakat montok misokodung sabaagi Blok Borneo montok monokodung songinan koporintaan di maan turidongo’ id nayatan Pisompuruan i kaanu manahak kaadangan pulitik om koundaran kumaa goduduo pogun.
Iti soira’ goduduo GRS-BN om GPS nakalantoi id Pomilian Agayo Pogun Ko-15 (PRU15) id pogun sopipoopori. GRS-BN nakalantoi 13 mantad 25 tindikohon Parlimen id Sabah, naamot GPS nakalantoi 22 mantad 38 tindikohon parlimen id Sarawak.
Nosusuhut kinalantaion diolo’, i Boyoon Montiri Sabah, Datuk Seri Hajiji Haji Noor om Premier Sarawak, Tan Sri Abang Johari Tun Openg pinapaharo pinibabarasan di minsusuab baino’ om nokosigampot boros
piniupakatan kohondot hal dilo’.
“Abang Johari minonolipaun doho’ di wagu nogi’ om miniboros yahai om nokopiupakat do misokodung yahai sabaagi Blok Borneo montok monokodung koporintaan turidongon id nayatan Pisompuruan i kapanahak kaadangan pulitik om koundaran okon nopo ko’ kumaa pogun nga nogi’ montok Sabah om Sarawak.
“Mimang yahai do Koporintaan Pisompuruan di ogirot om ingkaa nogi’ id nayatan Koporintaan Pogun,” ka disio id kapahabaran media disio di minsusuab baino’.
Nuhot do Blok Borneo misokodung miampai piomungan hombo id nayatan Pisompuruan, ka id Hajiji, Sabah om Sarawak miboboros dilo’ nga’ yolo’ lobi kumaa koporintaan Pisompuruan di kapanahak kaadangan.
“Amu’ yahai kaanu moboros do noondo sabab kakal dahai amu’ nokoilo kootuson pohimagon (PRU15),” ka disio.
“Tantu’ nopo, i komoyon ku do kaadangon nga’ koporintaan i maan turidongo’ id nayatan Pisompuruan kapanahak koundaran kumaa Sabah om Sarawak. Nunu i komoyon dati’ do kaadangon nopo nga’ i osonong montok Sabah om Sarawak… tohuri nopo nga’ asansagan tokou mamaramit do katapatan do montok dati’ id Sabah, ilo’ nopo nga’ toririmo do Sabah First (Sabah poguluonon).
“Ponimbangan osuul toririmo montok papatantu’ nunu i bobos osonong montok Sabah om Sarawak, om nombo-nombo boogian id nayatan Pisompuruan i kaanu popouyu diti kumaa dahai, kiguno yahai do monimbang miampai pointopot,” ka disio soira’ nuhot do nunu i komoyon disio do kaadangan.
