Hajiji miampai dio’ Lo dii Andi Muhammad om lalansanon GRS-BN id ababayan makan doungotuong dilo.
TAWAU: Rang Undang-Undang (RUU) i kapanahak waya’an kumaa koponuridongan Suruhanjaya Tenaga Sabah maan pawalado’ id Lintuhun Koundangan Pogun (DUN) do wulan Kaapat toun tiso’, ka di Boyoon Montiri Datuk Seri Hajiji Haji Noor.
Miampai ponuridongan Suruhanjaya Tenaga Sabah, ka disio, pogun diti kiharo kapanamangan poinponu’ di koponguludan intodonon ginaras dau, kosuul no ginaras lotirik.
“Iti nopo nga’ sombohogian mantad kopokionuan koporintaan pogun GRS-BN kohondot kopotutan tokou id Pibatosan Malaysia 1963 (MA63),” ka disio id ababayan miruba’ mogigiyon om makan doungotuong id Lintuhun Kung Ming SJK(C), do hiti di songkosodop.
Miampai disio nopo nga’ i calon GRS-BN montok Tawau, Lo Su Fui om Kalabakan, Datuk Andi Muhammad Suryady Bandy.
Ponorikohon GRS dilo’ minokianu mongungundi’ Tawau do mingat-ingat soira’ papataam undi om momili’ mongobi’ rayat i poposuul do kotundunan diolo’.
Ka disio, calon GRS-BN montok Tawau, Lo Su Fui nosusu om nosukod id Tawau, mantad dilo’ karati kopio isio di gunoon do mogigiyon do hiti.
Minoboros isio, pisokodungan pialatan GRS om Barisan Nasional (BN) i nokopiromut pogulu Pomilian Agayo Pogun (PRN) 2020 om nogi’ karalano’ bobos osonong montok Sabah gumura’ kumaa toguang.
“Iti no tisoiso’ no ralan montok dati’ popoburu’ Sabah om pisokodungan diti mositi’ pokitonan id undi kumaa calon GRS-BN id Pomilian Agayo Pogun Ko-15 diti,” ka disio.
Minoboros i Hajiji, Parti WARISAN osolon do Koporintaan Pogun GRS-BN i pinopotunda’ Sabah maya’ Palan Kopotundaan Hontolon Sabah Maju Jaya (SMJ).
“Yolo’ (WARISAN) aiso’ palan kaagal dilo’ (di maso id kopoirntaan), aiso’ o ababayan toi impohon di atalang. Nga’ montok koporintaan pogun GRS-BN, pasanganu tokou do SMJ, ilo’ nopo nga’ ‘cogan kata’ id Jata Sabah, i winonsoi miampai minaganu kokiraan di manifesto i pouyuhon tokou kumaa rayat,” ka disio.
Mantad kinopogintongan disio, otumbayaan i Boyoon Montiri do kosiwatan dio’ Lo di Andi, i po nogi’ Puru Lintuhun Koundangan Pogun (ADUN) Tanjung Baru, id pomilian agayo ko 19tw Kohopod om Iso’ diti.
Kikiro 1,000 tulun nokotindapou ababayan makan doungotuong dilo’ kaampai i Montiri Karaja’-Karaja’ Pinotomod om Koponguludan, Datuk Dr. Mohd. Arifin Mohd. Arif; Monguhup Montiri kumaa Boyoon Montiri, Datuk Nizam Abu Bakar Titingan; ADUN Balung, Datuk Hamil Awang; ADUN Kukusan, Rina Jainal, bagas Speaker DUN, Datuk Syed Abas Syed Ali, nogi’ tongo’ lalansanon parti komponen GRS om BN di suai.
