Dr. Jeffrey Kitingan ontok minanahak boboroson id ababayan dilo’
KENINGAU: Parti Solidariti Tanah Airku (STAR) alaid no do pinapaanjur Pibatosan Malaysia wagu id pialatan do Sabah, Sarawak om Malaysia i kaparati atalang do nindikohon tikid ‘entiti’ dilo’.
Presiden STAR, Datuk Seri Dr. Jeffrey Kitingan minoboros, Pinibatosan Malaysia 1963 (MA63) sinoinan id ‘premis’ di sopisuai om di maso Sabah om Sarawak aiso’ po rolou montok manangkaakun toi amu’ di nombo-nombo katatapan id pinibatosan dilo’.
“Pibatosan wagu nopo nga’ i isoiso’ no ponginsomokan montok monoibau koburilongon Malaysia. Ounsikou oku sabab i Kumoduo Ponorikohon Barisan Nasional (BN) Datuk Seri Mohamad Hasan minamarait do pibatosan wagu, nga’ okon ko’ somositi’ oku no do kaakun di padaahan disio.
“Montok do STAR, mimang yahai pibatosan wagu dilo’ kapanahak dati’ do lobi kosimbayanan om lobi osimbayan do gumura’ pongidgulu. Tulun Sabah amu’ mimang do akagasan di ababayan Malaya.
“Soira’ do kapaampai hal kousinan om kopotundaan, Sabah om Sarawak mositi’ pasanganu kosimbayanan montok papatantu’ timpu dumontol dati’ sondiri tumanud do angkab tokou sondiri’, okon ko’ Pisompuruan,” ka disio soira’ rinubaan katalib pinopoimpuun Ababayan Kopomuruanan Karait Hal Ngaawi’ Maso-Maso miampai lalansanon nokoiyonon do hiti di konihab.
Karait kokomoi kointalangan di Ponorikohon BN Sabah, Datuk Seri Bung Moktar Radin do BN Sabah momonsoi kootuson kohondot piromutan dau miampai Gabungan Rakyat Sabah (GRS), ka di Dr. Jeffrey, BN Sabah miagal di nombo-nombo parti pulitik, haro kopotutan papatantu’ rikoton pulitik dau sondiri’ do aiso’ kopononsogan toi pangampawong mantad labus.
“Montok do STAR, otoboi tokou, om mindad tokou do mintong kootuson BN Sabah. Amu’ tokou aarau-arau, om amu’ tokou maganu laang miampai amu’ momusorou.
“Pikikiro doti’ ilo’ do iso’ no kointalangan pulitik, amu’ oku koilo. Yoho’ nga’ moboros do STAR pasanganu 10 sumpilion. Nga’ kalansanan ku dilo’ do iso’ nopo kointalangan pulitik,” ka disio.
Minongomi do ababayan di konihab dilo’, ka di Dr. Jeffrey, mitingan dilo’ kiguno montok popoilo kumaa lalansanon nokoiyonon di pipiro hal maso-maso kosuul no puruankuasa pinotomod pakakaraja’ songkosuayan om tulun songkosuayan aiso’ kasagaan id Sabah.
Otumbayaan isio do koporintaan mositi’ popointalangan nokuro kiguno momonsoi pangkalan kointalangan montok tinimungan diti do monoibau kobolingkahangan i alaid no do potoguang dilo’.
“Okon ko’ manahak tokou dokumen kumaa diolo’, nunu podii ‘kerakyatan’! Ningkakaton koporintaan nopo nga’ ogirot. Oinsanan modidikot aiso’ kasagaan mositi’ pootodon muli’, ilo’ amu’ insan kosimban. Nga’ momoguno yahai pipiro ponit pangkalan kointalangan montok mongilo diolo’.
“Yolo’ i papatayad kointalangan slaa’ om amu’ tumingkod monondos Koporintaan Sabah do kakah om manahak tokou IC kumaa tulun ‘haram’ diti, yolo’ no i mongungudut. Iti no ralan diolo’ do momurilong rayat montok monirung amu’ kinalantaion diolo’ sondiri.
“Om noondo, minggisom yolo’ do paparaat po do kobolingkahangan miampai slogan kopomurilong miagal do ‘Sabah kita punya’ (Sabah yati’ sanganu); isai ‘yati’ diti? Modidikot aiso’ kasagaan?,” ka disio.
Lobi koponsol, ka di Dr. Jeffrey, tuduan do mitingan dilo’ nopo nga’ montok popoilo kumaa lalansanon nayatan guas di palan koporintaan mooi do kaanu yolo’ gumuli’ doid rayat om monoibau koinsanai pongudioan diolo’.
Pinointalang nogi’ disio do miampai monginggonop diolo’ do toilaan diti, lalansnaon nokoiyonon om tulun ginumuan oingkurian do apabantaan di pongimamang do kukumaraja’ ‘propaganda’ pembangkang.
