Upisor JaPen Sandakan, Abdul Aziz Abdul Karim minanahak kopointalangan id ababayan dilo’.
SANDAKAN: Soginumu’ 50 mogigiyon Kampung Karamunting do hiti nakaanu koundaran mantad ababayan kapahabaran do Koupisan Kopointalangan (JaPen) watas diti maya’ Info On Wheels (IOW) Kopointalangan Hal Noondo 2022.
Ababayan i pinoindalan mimpuun jam ko 8.30kosuabon di tadau Minggu’ katatalib dilo’, nakapaampai do duo kopointalangan di mononomboros naalap.
Songulun mantad id mononomboros, Mohd Azlee Mat Atar po nogi’ Luguan Unit Konsumerisme, Komontirian Pidagangan Suang Pogun om Hal Moomoguno (KPDNHEP) Raan Sandakan, pinopointalang di hal ngaawi’ kapaampai Kinoinsawaton Gatang Babarang om Kopotutan Moomoguno.
“Kalansanan tokou, maya’ do ababayan diti, tongo’ moomoguno koilo di kopotutan diolo’, lobi-lobi no mamaso do pogun potoguang do kobolingkahangan kinoinsawaton gatang tongo’ babarang. Mimang tokou mongimbulai moomoguno di lobi kikomilaan.
Mogigiyon Kg Karamunting minokinongou kointalangan i pinatahak di Upisor JaPen Sandakan.
“Mantad sunduk koporintaan nopo, songinan Puruankuasa’ Kabinet i ointutunan sabaagi Kounsol Ponondulian Pogun (MPN), tinuridong montok monoibau kobolingkahangan kinoinsawaton gatang babarang om surupukaraja’, do monguhup popoinggaan tonggungan rayat id timpu di koinggorit diti,” ka disio.
Songulun kawagu mononomboros, Abdul Aziz Abdul Karim i po nogi’ Upisor Kopointalangan Watas Sandakan, minanahak kointalangan kokomoi Inggisaman Pangalasan Pomuwalaian I-Biaya.
“Ababayan nopo diti nga’ inggisaman koporintaan montok papatantu’ tikid Paganakan Malaysia mantad tinimungan B40 om M40 lobi haro goos montok maganu piromutan kumaa kapanakadaian pomuwalaian miampai lobi kasanang,” ka disio.
Daamot dilo’, ababayan IOW do JaPEn nopo nga’ inggisaman papatayad om poporikot kointalangan kokomoi katatapan toi ababayan koporintaan kumaa mogigiyon maya’ tongo’ ababayan kapahabaran unit manau-panau.
Tulu pilion pahabaron i wonsoiyon do po’ompus timpu dilo’ kaampai no kokomoi do tomporuruol Covid-19, Ababayan Imunisasi Covid-19 Kabansaan om fasa Kosimbanon Pogun.
Ababayan IOW pinoindalan id koiyonon ngaawi’ rubpuon ginumuan i kapaampai do watas taman pomuwalaian, kokompungan, longkod pomobolian, masjid om surau, gereja, tokong om sopiagal dilo’.
Kapahabaran ginumuan do Unit Bergerak dilo’ poindalanon tumanud timpu nakatatantu’ do JaPen, id koiyonon di pinatantu’.
Kapahabaran ginumuan pohoroon id boros Melayu, Cina om India. Suai ko ilo’, boros nokoiyonon nga’ gunoon nogi’ montok papasanang do kapatahakan om kopomoromitan kointalangan.
