Nadzerah (tanga’) minanahak kopointalangan kuminaa di Supian.
KOTA KINABALU: Pisokodungan id pialatan Koupisan Kopointalangan (JaPen) Pogun Sabah om Kounsol Karaja’ Moomoguno Negara (MTPN) Sabah kopongingkawas kopurimanan kopotutan moomougno id pogun diti.
Presiden MTPN Sabah, Yang DiPertua Kevin Lo Kian Min minoboros, MTPN kiangkab do popiromut pisokodungan ogirot id kopoindalanan tongo’ ababayan montok mongingkawas kopurimanan om manahak ponontudukan kumaa rayat karait di tonggungan om kopotutan moomoguno.
“Wookon tonggungan MTPN nopo nga’ mongimbulai mogigiyon moomougno i momoguno pongumoligan sondiri, mongingkawas kabaahan mongingindapu’ om mongingkawas karalano’ kopongindopuan i kapangampawong koyuon sosial om nogi’ ikonomi pogun lobi-lobi no id Sabah.
Kevin (kolimo, gibang) pinapatahak tandamato kuminaa di Nadzerah.
“MTPN Sabah kiharo duo tonggungan tosuul ilo’ nopo nga’ i kumoiso’, manahak pawayaan kumaa oinsanan moomoguno om mongingindapu’ do papatahak ruputan id koponguhupan manalasai kobolingkahangan i aantaakn.
“I nopo koduo nga’ manahak gaa’ montok mongunsikou mongingindapu’ i haro kopurimanan tinonggungan miagal do Consumer’s Choice Award mooi do tongo’ moomoguno lobi otumbayaan kumaa komponi toi mongingindapu’ dilo’.
“Kohondot dilo’, kalansanan ku o oinsanan koupisan koporintaan do kaanu monguhup inggisaman papatayad kointalangan kumaa tulun ginumuan mooi do lobi yolo’ do komilo id kapanamangan kopotutan sabaagi moomoguno om potilombus dino kaanu momonsoi kopomolian di lobi kosonong,” ka disio kuminaa media katalib pinapaharo kotombuluyan tapantang kumaa di Potunud Kopointalangan Sabah, Nadzerah Abdullah, di kaawagu diti.
MTPN Sabah kiharo limo raan ilo’ nopo nga’ Kota Kinabalu, Penampang, Sepanggar, Putatan om Likas nogi’ haro soginumu’ 60 tulun puru i poinrojistor.
Nokotindapou nogi’ i Kumoduo Potunud Kopointalangan Sabah, Supian Musa; Luguan Monguhup Potunud (KPP) Bohogian Media om Piromutan Korporat, Peter Tong Ah Pin; KKP Bohogian Surupukaraja’ Koponguludan om Kousinan, Nur Diyana Ujit; Luguan Biro Koporuputan MTPN Sabah, Michelle Liew Pei Yee; Monobubut MTPN Sabah, Jason Pan Jun Chen om i Monunurat MTPN Sabah, Anna Liew Pei Ping.
