James (tanga’) ontok pinapaharo kinotombuluyan id Dodopiton Sepanggar.
KOTA KINABALU: Iso’ ababayan ponoludupan manuk i noilaan naantakan id watas diti i okito do nokoponinong kobolingkahangan lobi kagayo kumaa koporintaan pogun om nogi’ rayat Sabah.
Hal dilo’ nounggar nosusuhut kinotombuluyan i winonsoi sondiri di Monguhup Montiri Pomutanaman om Ponginsadaan I Watas Sabah, Datuk James Ratib doid Koupisan Veterina id Sepanggar di minsusuab baino’.
“Di tiinu’ wagu oku nogi’ ontok tombului doid Koupisan Veterinar id Sepanggar om ruminuba’ di tongo’ upisor do hilo’.
Noilaan tokou do karalanon diolo’ manamong ponoludupan manuk nopo nga’ oluhau kopio.
“Kohondot dilo’ minaganu oku piro-piro katatapan i kalansanan do koponoibau ponoludupan manuk miampai poinggayo doid Sabah,” ka disio pinoposotol id iso’ kointalangan media do hiti.
Minoboros i James, pointangaon nogi’ disio hal halal manuk sabab soira’ aantakan ponoludupan, aiso’ bohogian i koilo do koyuon manuk dilo’ nung halal toi haram montok tulun Islam.
“Noilaant okou do koulalaho’ ponoludupan manuk i naantakan do hiti nokopogowit duo hal di agayo kopio kumaa Sabah i kapaampai do Halal om nogi’ kinolobuon.
“Mantad sunduk kinotolubon, i komoyon tokou nopo nga’ koulalaho’ di sala’ id undang-undang diti nokoowit do kinorugion agayo id sunduk asil pinuhu do koporintaan Sabah.
“Naamot id sunduk Halal nopo nga’ nokopongimbulai kotongoban karait do koyuon do manuk nung halal toi amu’ halal montok akanon di tongo’ momoguno, lobi-lobi no kopio i kiugama’ Islam,” ka disio pinopointalang.
Tumanud di James, noilaan do ababayan koponoludupan manuk diti alaid no naantakan om nung amu’ ilo’ soibahan do tiindo nogi’, nga’ kotilombus ilo’ gisom soiraira’, om tulun ginumuan kapangakan manuk i amu’ noilaan koyuyuon dilo’.
Kohondot nogi dilo’, minomonsoi isio katatapan montok maganu piro-piro laang ogirot id koponoibahan do kobolingkahangan dilo’.
“Popo’iyon oku do pipiro upisor popogirotkuasa’ id kit-kit dodopiton doid Kota Kinabalu montok momonsoi pomorisaan opidot kohondot di ababayan kopoikidan manuk mooi do koindalan ilo’ miampai poinsonong om tumanud kooturan.
“Poposodia’ oku nogi’ do piro-piro padsakaian i mananud di tongo’ kontena i kotumbayaan do Koupisan Veterina popoindalan ababayan ponoludupan kaampai no momonsoi do kopointalangan oudut, gisom id ongoyon diolo’,” ka disio pinopointalang.
Pinosotol di James do bohogian disio manahak kopoingatan okodou kumaa toinsanan mononoludup montok moningkod koulalaho’ diolo’ do misindodog, pogulu laang undang-undang id awagat pootungon kohondot diolo’.
Nakaampai nogi’ id kinotombuluyan dilo’ i Luguan Seksyen Kuarantin om Import Eksport, Dr Nur Hasreena Nadia Ahlun; Luguan Seksyen Kopogirotankuasa’an, Francis Palikat; Upisor Monguasa’ Upis Kuarantin DVS, Dodopiton Sepanggar, Madsah Laudin, o wookon.
