Dr. Joachim (tanga’), Asmin (gibang) guminambar pongingitanan id kinotombuluyan tapantang dilo’.
KOTA KINABALU: Music Rights Sabah (MRS) Berhad pinapaharo kinotombuluyan tapantang doid upis di Kumoduo Boyoon Montiri Sabah, Datuk Dr. Joachim Gunsalam id Wisma Kewangan, di kaawagu diti.
Kinotombuluyan MRS i binuruan di Potunud Kotorinaan dilo’, Asmin Mudin om apat upisor di suai mogisusuai seksyen, kituduan manahak kopointalangan karait do surupukaraja’ nogi’ tonggungan do MRS kuminaa di Dr. Joachim.
Wookon nopo di pinawalad nga’ mokianu sokodung atag papatatap pomogunaan sinding tinaru Sabah soginumu’ 40 pihatus id nombo-nombo ababayan onjuran Koporintaan Pogun, suai ko’ lumansan do komontirian monokodung sinding-sinding tinaru Sabah.
Daamot dilo’, i Dr. Joachim po nogi’ Montiri Kopotundaan Pomorunan Pogun Sabah, minanahak sisimbar tosonong kohondot di kopoindalanan do MRS om lumansan koponguhup ilo’ popoingkawas nimbuluayan om ‘kreativiti’ tongo’ popoburu’ seni do tumilombus mimparagat kopiongoi di Tuduan Rikoton Sabah Maju Jaya.
Pinolombus nogi’ i Dr. Joachim tanda’ kosokodungan kumaa MRS montok mamagampot tuduan diolo’ maganu royalti di kopiadang di ninggisaman kreativiti diolo’.
MRS nopo nga’ tinan momumuhu om popoikid royalti i iso’ no montok sinding-sinding tinaru nokoiyonon id Sabah om WP Labuan i nonuan kopongokunan do koporintaan Pisompuruan pointonod di tulan Koiso’ 2022.
