Dr. Joachim (kaapat, wanan) minamaramit tanda’mato mantad di Dolly.
KOTA KINABALU: Koporintaan pogun tumilombus papatantu’ do Sabah kotilombus kosili rikoton kopoopuan di koimbayat lolobi no id kopoopuan kapaampai do pomorunan tumau om gas.
Id timpu di miagal, manamong do do sandad posorili’ om nogi’ monoibau kosimbanon koyuon tawan.
Kumoduo Boyoon Montiri po nogi’ Montiri Kopotundaan Pomorunan Datuk Dr. Joachim Gunsalam minoboros, pomorunan tumau om gas id Sabah kotilombus kosili mononoluod tagayo kumaa kosunion ikonomi pogun miampai aparagat maya’ do kotinanan dau om nogi’ komponi poinggompit koporintaan (GLC) miagal do Perbadanan Koburuon Tumau om Gas Sabah (SOGDC), Sabah International Petroleum (SIP), Sabah Energy Corporation (SEC) om nogi’ tinan di kotuturidong, SMJ Sdn Bhd.
Dr. Joachim (tanga’) guminambar miampai di Dolly om lansanon tapantang di suai.
“Po’ompus pipiro tulan nakatalib, nokokito tokou do kinosorokon ababayan kapaampai tumau om gas. Iso’ Piokunan Pisokodungan Komersial (CCA) nokoimagon id pialatan do Koporintaan Pogun om Petronas.
CCA dilo’ poposodia’ impohon kumaa goduduo bohogian nayatan akawas i papasaga’ Petronas miilang angkab koporintaan pogun om rayat montok mamagampot kobuuron id pomorunan tumau om gas id Sabah.
“Sinusuhut iti di kinopoimpuunan Palan Induk Gas Sabah 2026-2040 i kopokito do kousinan gas sandad i maan gunoo’ montok LNG, montok pomorunan pomurikit om nogi’ kopongimbulaian ginaras.
Dr. Joachim (tanga’) suminasi’ pinialanan MoU sabaagi pisokodungan kopotundaan om pingludaan komulakan Sabah, id pialatan di CEO Petra Resources Sdn. Bhd, Mohd Subky Bustari om i Potunud Balajaran Tiknologi Bahan (MTE) Sdn. Bh, Karen Cheng.
“Id kinouliton toun kumoiso’ Palan Kopotundaan Rikoton Sabah Maju Jaya (SMJ) di ko 29tw Kotolu 2022, pipiro pinibatosan i wookon dilo’ Pinibatosan Pisokodungan Miuhup (JCA) gisom no do Memorandum Pihunungan (MoU) om Pinibatosan Sublease (poposiwa’ kawagu) nosoinan id pialatan mogisusuai komponi om SOGDC i pasanganu om popoburu’ do Taman Pomorunan Tumau om Gas Sipitang (SOGIP).
“Pikikiro do kopoopuan tongo’ komponi lobig RM20 bilion diti, soira’ do otumboyo’, koowit waya’ ikonomi di agayo okon nopo ko’ kumaa mogigiyon id Sipitang nga nogi’ watas pososorili’ miagal do Beaufort, Papar om Tenom,” ka disio ontok pinopoimagon Pitimbungakan & Pokikitanan Tumau & Gas Sabah (SOGCE) Ko-9 2022 do hiti di tadau baino’.
Minongunsikou do Midas i nakalantoi pinapaanjur do SOGCE, manangkagayo ginawo mongilo do karatas karaja’ id po’ompus SOGCE Ko-9 nopo nga’ kapaampai do hal ngaawi’ i kiharo waya’ kumaa kopotundaan sosio-ikonomi Sabah om nogi’ toinsanan rayat.
Ka disio, koporintaan Pogun mintong do koposuulan kopotundaan ‘modal insan’.
“Haro o kogunaan montok mogintong kabaahan nokoiyonon di poinharo mantad om popoburu’ diolo’ montok monumboyo’ di kopomogunaan pomorunan tumau om gas, kapamansaian om ponuridongan,” ka disio i minoboros do Koporintaan Pogun nga’ mintong nogi’ do kosuulon manamong sandad posoirli’ om kosimbanon koyuon tawan.
“Okito ku pitimbungakan diti nga’ mogiboboros nogi’ di ginoris aanu monginwagu, kaantaban om kosiwatan id kosimbanon ginaras, intodonon ginaras i haro di suai montok ukaban om kapanahak koundaran kumaa sinakagon tokou do dumontol,” ka disio.
Kalansanan disio o SOGCE
i sabaagi longkod iso’ koundorongon do piromutan mangangaba’ tiknologi om abaal id pomorunan tumau om gas koponguhup do koporintaan Pogun id kopoindalanan Palan Kopotundaan SMJ.
Nokotindapou nogi’ i Monunurat Pointatap Komontirian Kopotundaan Pomorunan (MID), Thomas Logijin; Potunud Kotorinaan Perbadanan Koburuon Tumau om Gas Sabah, Haji Abdul Kadir Haji Damsal; Luguan Intodonon, Kopongukaban Monorina’ Petroleum Malaysia Petronas, Azmir Zamri; Luguan Upisor Eksekutif Petra Energy Bhd, Datuk Anthony Bujang; Ponorikohon Manganganjur Pitimbungakan & Pokikitanan Tumau & Gas Sabah, Potunud Projik Koponguludan Ababayan Midas, Dolly Jimayol; Timbang Presiden Totuo Kapatahakan Projik & Tiknologi Petronas, Bacho Pilong om oinsanan momuruan pomorunan.
