Juliah (kosiam, wanan) miampai di Kumoduo Boyoon Montiri po nogi’ Puru Lintuhun Koundangan Pogun (ADUN) Kundasang, Datuk Dr. Joachim Gunsalam (kohopod om iso’, wanan) om puru MUTIAR GRS-BN minomutul kes ponokotanda’ nokoimagon Ababayan Jerayawara Malaysia Peka-LPPKN DUN N.36 Kundasang, DUN N.37 Karanaan om DUN N.38 Paginatan kopihondot kapamaramaian Tadau Tina’ 2022 id Lintuhun Mogigiyon Ranau, Ranau, di konihab.
RANAU: Koonduan id pogun diti kosuul no tinimungan tina’ om ‘suri rumah’ kiguno toririmo maganu kosiwatan montok tumanud ababayan wagu i kopomoruhang do toilailaan om komimilaan diolo’.
Sawo id Boyoon Montiri po nogi’ Molohingon Kotinanan Muafakat Titipan Amal Sawo Mobi’ Rayat Gabungan Rakyat Sabah – Barisan Nasional (MUTIARA GRS-BN), Datin Seri Hajah Julia Salag minoboros, id timpu tinologi diti koonduan kiguno minsingilo bobos kogumu’ toilaan i aanu silihon puralan do monuridong kotinanan paganakan di ounsikou om oulud.
“Suai mantad dilo’, tinimungan koonduan nga’ kiguno do haro komilaan id pomogunaan tiknologi om internet sabab babaino’ diti asaru’ tokou kabasa’ di koulalaho’ ‘penggodam’ om ‘scammer’ i nokoinggumu’ miampai poposili koonduan kaampai no suri rumah sabaagi poimamamangon.
Juliah (tanga’) ontok minooi intong doid pokikitanan kopihondot do Ababayan Jerayawara Paganakan Malaysia Peka-LPPKN id Lintuhun Mogigiyon Ranau, Ranau, di konihab.
“Mantad dilo’, koonduan i potuu poingkaraja’ toi ko’ suri rumah kiguno toririmo osoding di koyuon pososorili’ om ogumu’ mambasa’ mooi do amu’ koimamang,” ka disio.
Minoboros isio dilo’ ontok pinopoimagon Ababayan Jerayawara Paganakan Malaysia Peka @ LPPKN Piomungan Watas Lintuhun Koundangan Pogun (DUN) Kundasang, DUN Karanaan om DUN Paginatan kopihondot kinapamaramaian Tadau Tina’ Nayatan Pogun Sabah 2022 id Lintuhun Mogigiyon Ranau, do hiti di konihab.
Ababayan Jerayawara diti nopo nga’ iso’ kinoumbayaan kotolu posusuhut do watas DUN N8 Pintasan di tulan Kotolu katatalib.
Ababayan diti tumongkop kumaa poliliput pogun tumanud DUN i pinili’ montok mnahaak koundaran kumaa rayat pogun Sabah id kopotundaan om kopoinggirotan paganakan.
Daamot dilo’, minonongkounsikou nogi’ i Juliah kumaa Kotinanan Mogigiyon om Kopotundaan Paganakan Negara (LPPKN) Sabah sabab ababayan nopo diti nga’ pisokodungan miampai do MUTIARA GRS-BN.
“Ababayan diti tadau baino’ sopisuai tokuri’ om poinsusuul sabba pinaanjur kopihondot kapamaramaian Tadau Tina’ do toun diti potilombus dino kapanahak kopongunsikohan kumaa kolubukan do songulun tondu’ i roitan do tina’.
“Mogisusuai surupukaraja’ pinoindalan kopihondot do ababayan diti wookon nopo nga’ Ababayan Surupukaraja’ Paganakan Maapanau (PKB) LPPKN i koposodia’ surupukaraja’ ponontudukan klinikikal, pomorisaan kolidasan, HPV DNA om koporojistoran mamogram do aiso’ kabayar kumaa koonduan di kosudong tumanud kosudongan di pinatantu’,” ka disio i minoboros do sinusulap padadagangan om pokikitanan i naampai do koonduan mantad tolu watas DUN dilo’ nga’ minaan nogi’ pohoroo’.
