Tun Juhar (dua dari kanan) ruminamit do tanda’mato mantad di Nicholas.
KOTA KINABALU: Soginumu’ do 20,000 naskah dalin boros Al-Quran i kumoiso’ id pomogunan pinosoliwan minomoguno boros Dusun Bunduliwan.
Ponorikohon Kotinanan Kadazan Dusun Murut Muslim SeMalaysia (KDMRS), Nicholas Sylvester minoboros, naskah nopo dilo’ pawakafon kumaa poliliput Sabah om kinopodolinan boros winonsoi di apat tulun papadalin nokoiyonon i kiharo toilaan balajaran akawas id kaganaan ugama’, kikomilaan id boros Arab om tinaru Dusun.
“Tongo’ papadalin di nakaampai id kinoposoliwanan diti kapaampai dii Dr. Yusuf Gimbad, Naim Mujim, Esibi Lakui om i Sulaimin Musinin.
“Boros Dusun Bunduliwan i gunoon nopo nga’ boros sitandod i gunoon doid koposolimbahan id Sabah.
“Kinopodolinan Al-Quran dilo’ nopongo no om babaino’ diti hilo’ id Koupisan Koburuon Islam Malaysia (Jakim) montok kopogintangan tohuri om talib dilo’ pokoyo’on doid KDN pogulu koposoliwanan naskah nokomoi.
“Kopodolinan Al-Quran id boros Dusun nokotimpuun di wulan Koiso’ 2019 om nopongo di tulan Kohopod om Duo 2020,” ka disio kuminaa media katalib pinapaharo kinotombuluyan tapantang kumaa di Molohingon Pogun Sabah (TYT) Tun Juhar Mahiruddin id Istana Seri Kinabalu, di tadau Kotolu.
Daamot dilo’, i Nicholas po nogi’ Potunud Projik Kopodolinan Al-Quran (TAQ) Dusun pinopointalang tuduan nopo kinotombuluyan idlo’ nga’ mokianu kasagaan mantad di Tun Juhar Mahiruddin montok manahak boros pason montok Dalin Al-Quran di pinosoliwan id boros Dusun dilo’.
Nokotindapou nogi’ id kinotombuluyan dilo’ i Mufti Koporintaan Pogun Sabah po nogi’ Monontuduk Projik TAQ Dusun, i Datuk Bungsu @ Aziz Jaafar om i Kumoduo Ponorikohon KDMRS Muslim, Azizul Julirin.
