Dr. Maximus Ongkili
KUALA LUMPUR: Parti Bersatu Sabah (PBS) tumilombus om potimporon otiu’ kumaa piomungan pulitik nokoiyonon Gabungan Rakyat Sabah (GRS).
Presiden dilo’, Datuk Seri Dr. Maximus Ongkili minoboros, sundung mamagatang do kororohian Parti Warisan Sabah (Warisan) montok misokodung miampai PBS id Pomilian Tagayo Pogun ko-15 diti dumontol, parti orujut tinaru bobos otuo id Sabah dilo momili montok tonggungan poinponu kumaa GRS
“Yati’ id PBS mamagatang do koyuon pulitik Warisan om Prwsiden dilo’ Datuk Seri Shafie Apdal montok misokodung om miuhup id pomilian tagayo pogun dumontol. Nga’ sabaagi parti orurukut tinaru, tumopot om otiu’ poinponu ilo’ sabaagi puru GRS om tambalut ponokiuhup dau,” ka di Maximus id iso’ kointalangan di tadau baino’.
Montiri id Koupisan Luguan Montiri (Hal Sabah om Sarawak) dilo’ minoboros, poburuon pulitik GRS, miagal di pinointalang di Ponorikohon dilo’ Datuk Seri Hajiji Haji Noor id kinopoimpuunan dilo di tulan nakatalib, okon nopo ko’ olidang om po’ompus nga nogi poingimpau do rayat.
“Alapon tokou o Warisan om mononokodung do maganu tuduan di haro montok ototopot popotunda Sabah om mamajamin songinan pogun di koburu’ om oumolig, posimbayan mantad modidikot songkosuayan aiso’ kasagaan,” ka disio.
Minoboros isio, nombo-nombo parti pulitik nokoiyonon inpantangon id Sabah kaanu nogi momoguno tuduan om angkab GRS miampai amu’ nuru’ sumili puru paganakan GRS.
“Kogunoon do misokodung om piilangan pulitik sopiagal diti amu’ insan do kopononsog kopio nung piadangon poguku diti, lolobi no pisokodungan om piuhupan id pisompuruan pulitik, okon nopo ko’ id Sabah nga nogi’ miampai Sarawak, ilo’ nopo nga’ Borneo Malaysia.
“Kanou tokou no monimpuun kawagu id kopogihuman pisompuruan pulitik miagal di pinokitanan do tongo’ parti nokopogulu i minonguhup pinonuridongan pogun di toun 1963. Kanou tokou no maganu pontudukan mantad pisompuruan pogulu diti i ginuno do moninimpuun parti pulitik Sabah id kinoponuridongan Malaysia.
“Sabah Poguluonon, Oupus Sabah om Sabah Misompuru … Ilo’ no ngaawi slogan i kiguno oinsanan tokou no migit,” ka di Maximus.
