Dr. Joachim om i Dr. Maximus (tanga’) guminambar pongingitanan miampai dilo’ oinsanan puru PBS i nokotindapou doid seminar dilo’.
RANAU: Timbang Presiden Parti Bersatu Sabah (PBS) po nogi’ Luguan Bohogian Kundasang, Datuk Dr. Joachim Gunsalam minonongkounsikou kumaa kinorikotan di Presiden PBS, Datuk Seri Dr. Maximus Ongkili id Seminar PBS Zon Tisan Kotonobon Kabaatan P.170 Tuaran om P.179 Ranau i pinaanjur doid Lintuhun Mogigiyon Ranau, do hiti di konihab.
“Kounsikohan kinorikotan di Presiden tokou. Tohuri nopo dii nga’ nakaanu tokou do mogitutuka’ montok kumoinsan nogi’ pointonod do pandemik Covid-10,” ka di Dr. Joachim id boboroson kinoompokon do seminar diti.
“Tantu’ no do kinorikotan di Presiden kapanahak pongunsuban om koposindak sunduan di lobi kasawat kumaa oinsanan puru PBS di nokotindapou,” ka disio.
Miampai minongunsub oinsanan tutumanud seminar do mamarati om momuginawo hal di pinatahak di Presiden PBS id boboroson disio, ka di Dr. Joachim, seminar diti miampai amu’ mitilombus nakapanahak posodiaan poinggonop kumaa puru PBS id koponoguangan Pomilian Agayo Pogun (PRU) di obontol.
“Hombo noilaan PRU kapanau do amu’ no alaid,” ka disio.
Dr. Joachim po nogi’ Ponorikohon Manganganjur seminar diti minoboros, kosuul montok Parlimen Ranau, iso’ puruankuasa’ (AJK) tinuridong om iti koposili kukumaraja’ montok monguhup nombo-nombo puru PBS di tumanding.
Dr. Maximus ontok suminuang id luan lintuhun om kinorikotan disio sinuau dilo’ puru PBS om tinanud di Dr. Joachim.
“Sokodungon tokou isaisai nopo calun di poungkakaton do Lansanon Akawas Parti i potuu mantad PBS toi ko’ Parti Komponen Gabungan Rakyat Sabah (GRS),” ka disio.
Monongkounsikou nogi’ isio sabab kikosiwatan pinapaanjur iso’ seminar i oponsol diti tu’ kapagaras do puru PBS om soira’ doid raan diolo’ sompoopori.
Minoboros i Dr. Joachim, maya’ seminar diti oinsanan puru PBS karati om kopomuginawo di poburuon do PBS om kopongilag totondos mantad nombo-nombo bohogian atantu’ montok momusus do parti.
Dr. Joachim (gibang) pinapatahak tanda’mato kuminaa di Dr. Maximus om poingintong i Ponorikohon Puruankuasa’ Popoindalan Seminar, Arthur Sen (wanan).
Soginumu’ turu’ bohoian PBS nakaampai id seminar diti ilo’ nopo nga’ Kundasang, Tamparuli, Kiulu, Sulaman, Pantai Dalit, Karanaan om Paginatan miampai di Luguan Exco Tinimungan Koonduan om Komulakan.
Wookon di nokotindapou, Kumoduo Presiden PBS po nogi’ Luguan Bohogian (KB) Tamparuli, Datuk Jahid Jahim; Monunurat Tagayo PBS po nogi’ KB Kiulu, Datuk Joniston Bangkuai; KB Sulaman, Juin Saman; KB Pantai Dalit, Lizuan Sarabun; KB Karanaan, Datuk Bernard Dalinting; KB Paginatan, Arthur Sen, om nogi’ puru ngaawi’ Kounsol Takawas (AMT), Stanis Buandi om i Suman Yasambun, Luguan EXCO Tinimungan Komulakan PBS Longkod, Christoper Mandut, Luguan EXCO Tinimungan Koonduan, Datin Malianah Ugau nogi’ Gerakan Belia-Beliawanis Bersatu (GBBB) Ranau om Tuaran.
