Hajiji (tanga’) guminambar miampai tongo’ mongongobi’ kampung id Tongod i nakaramit geran tana’ diolo’ id ababayan dilo’.
TONGOD: Koporintaan Pogun Gabungan Rakyat Sabah-Barisan Nasional (GRS-BN) tumilombus do popoburu’ Sabah kaampai no watas labus kakadayan maya’ do Rikoton Sabah Maju Jaya (SMJ).
Boyoon Montiri, Datuk Seri Hajiji Haji Noor minoboros, koporintaan pogun opoduli’ om amu’ kasaga’ do watas ngaawi’ i osodu’ mantad Kota Kinabalu do kotohuri, sabab rayat id watas dilo’ nga’ kikopotutan mamaramit kopotundaan om koundaran mantad kinomordikaan pogun.
“Iti no i powonsoiyon do koporintaan GRS-BN sabab montok dati’ i nopo oponsol nga’ karamit o rayat nunu nopo kopotundaan om nogi’ tongo’ kogogonopan i apatut do aanu diolo’,” ka disio.
Hajiji nonuan kopointalangan Projik Komersil LPPB kapaampai ponuridongan 6 tinan kadai teres 2 tingkat id Kakadayan Tongod.
Minoboros isio onotk pinopoimagon Ramai Kaamatan Watas Tongod Toun 2022 om Ababayan Mamabak Tana’ Projik Komersil Kotinanan Kopotundaan Pomuwalaian om Kakadayan (LPPB) id Lintuhun Poingukab Dataran Rakyat Tongod, do hiti di konihab.
Minoboros i Hajiji, koporintaan GRS-BN mogowit do Tongod om watas ngaawi’ di suai i amu’ songkuro nokotunda’ lumabus mantad kinotohurionon.
“Iti no angkab tokou soira’ nopo do minonowoli pomorintaan pogun di tulan Kosiam 2020 di nakatalib. Koporintaan pogun mogowit kopotundaan lobi-lobi no id watas labus kakadayan montok purimanon do rayat tokou i solinaid diti lumansan toisoiso’ i osonong toi kapanahak koundaran kumaa dioo’, i aanu powonsoiyon do koporintaan,” ka disio.
Ka disio, koporintaan GRS-BN nga’ pointotopot nogi’ id panalasaian hal kosongonuan tana’ id pogun diti miagal di kinapatahakan soginumu’ 611 geran tana’ i kiginayo do 2,893 ekar kumaa mongungupalai mantad watas Tongod.
Tumanud disio, mantad ginumu’ dilo’, soginumu’ do 238 nopo nga’ geran tana’ adat pogun (NT) mantad no di upalai tana’ noubasanan, naamot geran NT mantad Ababayan Surupukaraja’ Tana’ Adat Pogun Sabah (PANTAS) nopo nga’ soginumu’ do 373.
“Di ko 12tw Kolimo katatalib, pinapatahak oku do 206 geran tana’ NT kumaa mongungupalai id watas Pitas. Om di Konihab pinapatahak oku soginumu’ 181 geran id watas Telupid,” ka disio.
Minoboros i Hajiji, koporintaan pogun maya’ do Koupisan Tana’ om Monunukat (JTU) toririmo minggisom do mogintong om monorisid koinsanai upalai tana’ i pinotoguang do rayat.
Tumanud disio, nung toisoiso’ upalai dilo’ aiso’ nunu-nunu kohimpogongan, aiso’ padaahan do kopolobusan geran montok tana’ dilo’ amu’ aanu popoindalan.
“Kohondot dilo’, pokionuon ku oinsanan mamaramit geran tana’ do morobuat tana’ diolo’ do pomutanaman, sabab kopongingkawas ilo’ do koonu-onuan diolo’. Nung kaanu nga’ misokodung no miampai nombo-nombo kotinanan koporintaan di poinggompit montok popoburu’ tana’ dilo’ miampai mogisusuai ponit tanom kaampai no piasau sawit.
“Tumanud ruputan ‘Statistik Eksport Import Mengikut Negeri’ montok tulan Kotolu 2022 i pinalabus di kaawagu diti, Sawit Malaysia nokoposurat kopoudaran tumau sawit kiginumu’ do RM7.5 bilion, miampai Sabah nokoposurat ginumu’ bobos akawas RM1.8 bilion toi 23.5 pihatus,” ka disio kawagu.
Ka disio, kinapatahakan geran tana’ dilo’ okon nopo ko’ montok papatantu’ mogigiyon kaanu tana’, nga’ nogi’ monguhup diolo’ do mongingkawas ikonomi maya’ pomutanaman miagal do pananaman piasau sawit om tanom suai.
“Kohondot dilo’, mamason oku kumaa tongo’ mamaramit geran NT do popoburu’ tana’ diolo’ om amu’ maganu ralan opoting do maganu kountungan miampai papadagang dilo’,” ka disio i pinapatahak nogi’ do iso’ kopoimaganan kokompungan tana’ pogun ilo’ nopo nga’ Kampung Sanan kiginayo do 49.3 ekar i pinoimagon di ko 21tw Kohopod 2021 id watas Tongod.
Karait kokomoi do Ramai Kaamatan, ka di Hajiji, Kaamatan kiguno tilombuson momogompi’ om inggirotan sabaagi kopoinggirotan pisompuruan om piuludan id kopogisusuaian koubasanan mogigiyon orukut tinaru id pogun diti.
I Hajiji po nogi’ Montiri Kousinan nga’ pinopolulus upalai Puru Lintuhun Koundangan Pogun (ADUN) Kuamut, Datuk Masiung Banah montok monuridong walai kos osiriba’ do LPPB id Tongod, projik momonsoi astaka id Kompleks Sipoot Tongod om Walai Longkod Koubasanan Tongod/Kuamut.
Nokotindapou nogi’ i Montiri Kopotundaan Labus Kakadayan, Datuk Jahid Jahim, Monunurat Koporintaan Pogun, Datuk Seri Sr. Haji Safar Untong, Monguhup Montiri Koporintaan Koiyonon om Pomuwalain, Datuk Isnin Haji Aliasnih, ADUN Telupid, Jonnybone J Kurum, Potunud JTU, Datuk Bernard Liew om i Upisor Watas Tongod, Haji Mohd. Fauzi Norbeh.
