Hamzah (gibang) miampai di Ruslan (tanga’) pinopoindalan gimik mongomot parai id ababayan dilo’.
KUALA PENYU: Ramai Kaamatan nopo nga’ kapamaramaian kinalantaion Paganakan Malaysia minonoibau nunu nopo kobolingkahangan suang pogun.
Tumanud di Montiri Suang Pogun Datuk Seri Hamzah Zainudin, maya’ kopomorotian miagal dilo’ do pisokodungan ogirot om piuludan id nayatan Paganakan Malaysia aanu do poposindak po.
“Ounsikou oku kopio soira’ kokito kapamaramaian Ramai Kaamatan di osonong kopio.
“Iti kopokito do Ramai Kaamatan okon nopo ko’ mamaramai kinalantaion asil nomot parai nga nogi’ aanu do maan po poingkawaso’.
“Sapatut dilo’ do kosili iso’ uhu i aanu gunoon do Kaamatan id timpu dumontol, okon ko’ montok nopo mamaramai kinoomotan parai nga nogi’ mamaramai kinalantaion tokou id minonoguang nunu nopo kobolingkahangan doid pogun,” ka disio.
Norashikin (kotolu, gibang) om i Tracy (koduo, gibang) guminambar miampai tongo’ nakalantoi Pinialaan Unduk Ngadau Nayatan Watas Kuala Penyu.
Minoboros isio pinopoimagon Ramai Kaamatan Nayatan Watas Kuala Penyu, di tadau Ko’onom, ka di Hamzah kararamaian toun-toun dilo’ kiguno ramaion do oinsanan rayat Malaysia amu’ momuntuk tinaru, ugama’ om kinoubasanan.
“Ramai Kaamatan kiguno ramaion do oinsanan mogigiyon id poliliput pogun sabab kosili ilo’ do kinolobusan osuul i kapanahak nindopuan lobi kagayo om kopountung pogun kosuul no id siktor ponombuluyan,” ka disio id Lintuhun Dato’ Shahbandar Makang.
Id ababayan dilo’, sawot di Montiri Suang Pogun, Datin Seri Norashikin Abdul Ghani om sawo di ADUN Kuala Penyu, Datin Tracy Tan pinapatahak tutungkap kumaa di nakalantoi Pinialaan Unduk Ngadau Watas Kuala Penyu.
Panantaban tohuri dilo’ nokopokito di duo ladjong mantad Kampung Kelampung i mongingia’, Hemeliza Lasayung, 26, om Mongungulud Kopoindalanan om Popolombus Radio, Sherly Suzie, 27, sopipoopori pinili’ bontugan om kumoduo bontugan.
Goduduo diolo’ mongobi’ watas Kuala Penyu om Watas Okoro’ Menumbok kumaa pialaan id nayatan pogun doid KDCA do ko 31tw Kolimo diti.
Nokotindapou nogi’ i Monguhup Montiri Karaja’ Agayo, Datuk Limus Jury po nogi’ ADUN Kuala Penyu; Montiri Karaja’-Karaja’ Pinotomod, Datuk Dr. Mohd Arifin Mohd Arif; Monguasa’ Pulis Sabah, Datuk Idris Abdullah; ADUN Lumadan, Ruslan Muaram; ADUN Melalap, Datuk Peter Anthony om i ADUN Limbahau, Datuk Juil Nuantin.
