Dr Joachim sibinsang mengkoq Tseu koq Pengarah Urusan Fasarina Express Mart, Hajah Fauziah Datuk Hj Mohd Din sambil pinatong uleq Mohd Tamin
LABUAN: Lebih ikoh produk-produk usahawan Industri Kecil dan Sederhana (IKS) Sabah betiru bulih tekoleq taq pulau tu mengkoq kerjosomo pemasaran antara Kementerian Pembangunan Perindustrian (MID), Dewan Perniagaan Usahawan Sabah (DPUS) koq Fasarina Express Mart.
Timbalan Ketua Menteri Sabah ngerangkap Menteri Pembangunan Perindustrian, Datuk Dr Joachim Gunsalam anu ngumum ni ngharap ndoq rakyat taq Wilayah Persekutuan (WP) Labuan kuleq nambut alap pemelanan program ea.
“Mudaan objektif program tu teloot koq setarus ni muan impak taq usahawan IKS teposok penangunan ekonomi taq laat Sabah ngkoq pan WP Labuan,” baraq ni betaq berusap diom Maidan jamuan mangan langah elaw sebetaq lintaran kerjo ni taq Fasarina Express Mart mitu bangi dilaw.
Dr Joachim besomo Pengarah Urusan Fasarina Express Mart, Hjh Fauziah Datuk Hajah Mohd Din ngenda produk tempatan anu pinadagang murik.
Sambil ngusap terimo kasih taq Fasarina Express Mart kerna muan peluang taq produk usahawan IKS Sabah pinasaran taq WP Labuan, beliau betutur, itu siabai mengkoq usaha Perintah Laat Sabah untuk ngerancak lagi promosi koq pemasaran produk IKS Sabah narusan Kempen Beliin no Barangan Buatan Sabah mengkoq slogan “Belilah Barangan Buatan Sabah, Mantap Bah Ini Gaman”.
“Itu pan siabai mengkoq program anu boi nirancang uleq Kementerian yono Kempen Beli’in Barangan Buatan Sabah mengkoq natap abutan hasil dagangan taq taun tu seikoh RM25 juta.
“Kempen tu ngeruo salah dikauq inisiatif MID endea Pelan Penangunan Sabah Maju Jaya (SMJ) 2021-2025. Kementerian ku boi nusun17 program anu akan pinelanan taq taun tu. Kempen tu boi niresmi uleq YAB Ketua Menteri Sabah taq 27 Januari 2022 pelimpas taq daerah Ranau koq salah dikauq tujuan kempen tu pinelanan yono untuk notokon semangat patriotisme ngkoq reso bangga rakyat Sabah terodop barangan buatan tempatan,” ling nei.
Dr Joachim betaq tinemuan media
Dr Joachim betutur, alih amun WP Labuan, MID nimpoon Jabatan Pembangunan Perindustrian dan Penyelidikan (DIDR) pan akan nandatangan duo memorandum persefahaman (MOU) taq 27 Mei tu.
Tarang nei, MOU tinaat yono antara DIDR koq Pasaraya GM Klang Wholesale City ngkoq Segi Cash & Carry Sdn Bhd.
“Program tu akan masaran produk usahawan IKS Sabah taq pasaraya taq Semenanjung Malaysia. Aku pan binaran, Pasaraya Segi yono dembua pasaraya tempatan anu ruun 56 cawangan taq semimon laat taq Selangor koq pan Perak,” bara nei.
Beliau ngharap, mengkoq melanan program tu pan penengko asal lua’man Sabah anu natap taq WP Labuan ngkoq Semenanjung Malaysia akan ngelapaan intomon taq kakanan asli tempatan Sabah dokon ikan tausi, sambal tuhau, sambal bambangan, pes soto ngkoq dedangai lagi kakanan tempatan anu niusaha uleq usahawan IKS Sabah.
“Landu no aku ngalu-ngalu kerjosomo tu kerna mengkoq cara tu Kementerian ngerati nabang mepenik taraf sosio-ekonomi ngkoq mepenik asil eksport laat Sabah,” ling nei.
Nuut tekoh yono Pembantu Menteri Pembangunan Perindustrian, Mohd. Tamin Zainal; Timbalan Setiausaha Tetap Kementerian, Benedick Bisoni; Pengarah DIDR, Tseu Kei Yue ngkoq dedangai pegawai Kementerian.
