Hajiji (entenga) koq pemimpin debagi ngetu parai ngelimbangan simbol pelansaran Pesta Kaamatan Tuaran debuie.
TUARAN: Ketua Menteri Datuk Seri Hajiji Haji Noor no’oq wakil rakyat koq pemimpin ndoq sentiaso ngenjogoon telingo ngkoq tarus siubung mengkoq rakyat untuk ngeratian aspirasi segaie mengkoq lebih alap.
“Linganan ku taq ka’am semimon wakil rakyat ngkoq pemimpin ndoq niaq merantian pesikotan duai empadang,setemu mengkoq rakyat koq mekilo pasti masalah anu odopon segaie,ngkoq taq masa anu somo nulusan eyen jo isu taq kawasan masing-masing.
“Daa ngagad se’ngkon masalah pelantung, sebalik ni sentioso pesikot mengkoq rakyat untuk ngendoq atai koq fikiran pikiran segaie,” ling nei.
Berusap taq maidan sampangan Pesta Kaamatan Peringkat Daerah Tuaran taq Dewan Seri Sulaman mitu songom debuie. Hajiji anu ngeruo Adun Sulaman nuut pasan taq semimon pegawai daerah ngkoq penjawat awam taq jabatan bekaitan ndoq sentioso proaktif diom melanan tanggungjawab anu boi niamanah.
Endoh Hajiji Datin Seri Juliah Salag metekoh hadiah taq pemanang Tuaran 2022 Unduk Ngadau Betsy La Salle.
“Segaie niamanah untuk nelasai masalah rakyat khusus nei meluar bandar ngkoq muan maklum semimon usaha atawa tindakan kerajaan untuk rakyat.
Boron pemimpin masyarakat, ling nei, bengen peranan penting ngenda sungan gaie ruun taq petingkoan anu lebih alap untuk moho perubahan.
“Sentioso mekaleh gamut gamai koq makareso keperluan segaie. Mengkoq muat begea, kaam akan kuleq metekoh semimon rancangan penangunan kerajaan anu muan manfaat taq rakyat.
“Mengkoq cara tu, rakyat niaq akan sanang niaru mengkoq abar-abar palsu koq dedangai taktik untuk ngakalan sigaie,” ling nei.
Hajiji nitik agung mepituq untuk ngelansaran Pesta Kaamatan Tuaran taq Dewan Seri Sulaman Songom debuie.
“Itu yono aspirasi Kerajaan ndoq kiti semimon kuleq tarus sidembuaq nkoq fokus taq dikauq ogoan ngkoq niaq tekasaw mengkoq kasawan anu ngalang kemajuan.
“Kerajaan GRS-BN boi nedioon rancangan penangunan Orop Ogo Sabah Maju Jaya (SMJ) untuk nangunan laat ti koq rakyat nei. Kiti ingin moho lebih ikoh penangunan teposok narik dedangai lagi ikoh pelaburan domestik ngkoq antarabangsa muan impak langah taq Sabah.
“Uleq ea, untuk pusik ngogo bunda,sung’no kiti muat lebih ikoh lagi. Sembatan ni, pebuatan lebih daras man betutur oyo, ling ni.
Taq masa anu somo, Hajiji nohok rakyat Sabah untuk mantaw sepenoq nei embukut Kerajaan ndoq usaha nangunan laat ngerati binuat mengkoq jaya nei.
Tedaaw, Ketua Menteri betutur Pesta Kaamatan mesti tarus jadji sungan menop perpaduan untuk masyarakat tei nang dedangai budaya.
Malahan, baraq nei perpaduan ngkoq kejosomo endiom banan rakyat Sabah yono unsur penting anu sanang penesia ensedi.
“Taq Sabah, rakyat ni ginisan kaum, agama koq kepesoyoan boi elum besomo ngkoq cara harmoni nimpoon dedaaw lagi. Khawin segul boi ngasilan payatan oyo dedangai etnik koq kepesoyoan anu nerimo koq ngurmat antara dangan nkoq debagi,” ling nei.
Niramaian taq buwan Mei, Pesta Kaamatan betiru niaq no sinampang uleq masyarakat Kadazandusun, Murut koq Rungus (KDMR)jo, ketapi uleq semimon rakyat taq laat tu.
“Itu yono gambaran sebana nei konsep Keluarga Malaysia anu tinekon uleq Perdana Menteri Datuk Seri Ismail Sabri Yaakob,” bara nei.
