Hajiji (koduo, wanan) miampai di Amberly om goduo molohing dau io’ Maidon Bernadus dii Florena Francis Obong pinopokito tanda’ osonong ontok ruminuba’ diolo’ id Menara Kinabalu, di tadau baino’.
KOTA KINABALU: Boyoon Montiri (KM), Datuk Seri Hajiji Haji Noor minamason kopisanangan kalantoi kumaa di tadi’ Amberly Maidon om i Hayden Hansanon Humprey Suimin i nopili’ mongobi’ tiim Malaysia kumaa World Championship of Performing Arts (WCOPA) i kaanjur doid Disneyland, California, Amerika Syarikat do ko 21tw Koturu’ gisom ko 2tw Kowalu’ 2022.
“Oondos oku kumaa di tadi’ Amberly om i Hayden tu’ nopili’ mongobi’ pogun kumaa WCOPA. Mogowit yolo’ do ngaran pogun Sabah, Malaysia id nayatan pomogunan. Otumbayaan oku do kaanu yolo’ popowonsoi di bobos osonong.
Mongunsikou oku kopisanangan kalantoi,” ka di Hajiji ontok ruminuba’ di Amberly om molohing dau doid upis disio id Menara Kinabalu, di tadau baino’.
Duo no tulun mantad Sabah i nopili’ mongobi’ pogun diti kumaa WCOPA, i ointutunan po nogi’ do “Olympics for Performers and Entertainers”, i nokopomologkus ogumu’ artis nabantug id Malaysia miagal di Fanzi Ruji, Eylia Guntabid, Aina Abdul om i tiagak Siti Sarah.
I Amberly, 15, monongkiala’ id kategori ‘Vokal Junior’ (montok kiumur 13 gisom 15 toun) om i Hayden id kategori Vokal Senior (18 gisom 24 toun).
Amberly, susumikul Sikul Mananga’ Kabansaan (SMK) Datuk Peter Mojuntin, Penampang nakalantoi midol amas id Malaysia Championship of Perfoming Arts (MCOPA) 2021.
