Hajiji (kolimo, wanan) minoboros kumaa magaganu habar katalib minonorikohon mitingan GRS di sodopon baino’.
KOTA KINABALU: Gabungan Rakyat Sabah (GRS) poimpuunon miampai pohimagon id Longkod Konvensyen Sompomogunan Sabah (SICC) do hiti do ko 26tw Kolimo diti.
Hal dilo’ pinahabar di Boyoon Montiri po nogi’ Ponorikohon GRS, Datuk Seri Hajiji Haji Noor katalib minonorikohon mitingan koduo piomungan dilo’ id Menara Kinabalu, do hiti di baino’.
“Miampai kopoimpuunan GRS do pohimagon dilo’, komoyon tokou do kotimpuun no o timpu wagu pulitik pogun Sabah maya’ piomungan i pokitanan tokou kumaa rayat montok koundaran pogun Sabah om nogi’ montok mogisokodung momorinta’ om popoburu’ pogun Sabah do timpu dumontol,” ka disio.
GRS, i kapaampai do Parti Pribumi Bersatu Malaysia (BERSATU), Parti Bersatu Sabah (PBS), Parti Solidariti Tanah Airku (STAR) om Parti Maju Sabah (SAPP) pinolulus koporojistoran do Koupisan Poporojistor Kotinanan Malaysia (RoS) di ko 11tw Kotolu, toun diti.
Minoboros i Hajiji, id mitingan di tadau baino’ nga’ nokopogiokunan nogi’ diolo’ do poposili ponorikohon om puruankuasa’ mononorina’ GRS id tikid bohogian Parlimen doid Sabah.
“Suai ko ilo’, nakaakun tokou nogi’ do monuridong iso’ puruankuasa’ pisokodungan ‘solidariti’ GRS om Barisan Nasional (BN).
“Oilaan tokou do koporintaan Pogun nopo nga’ Koporintaan GRS om BN. Tuduan tokou monuridong puruankuasa’ diti nopo nga’ montok monompuru tongo’ parti okon nopo ko’ id suang GRS nga nogi’ miampai do BN. Mooi do koponoguang tokou do pomilian agayo parlimen do mogiuhup, nung kaanu nga’ aiso’ pogitutukaan id pialatan GRS om BN. Iti no tuduan tosuul kopio,” ka disio soira’ do nudio.
Mitingan dilo’ nga’ minogiboboros nogi’ di upalai ngaawi’ parti di orohian sumompuru do GRS.
“Mantad dilo’ kootusan tokou nopo nga’ do tadau diti mitingan nakaakun do mamaramit Parti United Sabah National Organisation (USNO) do sumompuru GRS.
“USNO minongupalai sumompuru GRS di tulan Koiso’ 2021. Sontoun no sitanga’ nakatalib om diti tadau baino’ pinatantu’ tokou do mamamaramit USNO,” ka disio.
Minoboros i Hajiji, suai ko’ ilo’, minamaramit nogi’ yolo’ do upalai mantad parti ngaawi’ di suai miagal do Parti Kesejahteraan Demokratik Masyarakat (KDM), Liberal Democratic Party (LDP) om Parti Cinta Sabah (PCS) do sumompuru GRS.
“Mongunsikou tokou di upalai diolo’ montok sumompuru GRS. Nga’ miampai pointantu’ kipomusarahan tokou do momoguno okuri’ timpu montok monongkiboros om mongingkawas do pirotian… we need to get to know each other better first.
“Nga’ sabaagi tanda’ kopongunsikohan kumaa angkab diolo’ montok sumompuru GRS, pogompiton tokou yolo’ doid ababayan ngaawi’ GRS om alapon tokou yolo’ kumaa id ababayan kopoimpuunan GRS.
“Kirati do mamagatang tokou kopio di angkab diolo’ sumompuru GRS nga’ momoguno tokou nopo do okuuri’ timpu sabab upalai diolo’ wagu nogi’ patahako’ kumaa doho’ iso’ duo tulan di nakatalib.
“Mantad dilo’ nokuro tu’ rinamit tokou USNO? Sabab USNO nokopongupalai di lobi sontoun nakatalib. Ilo’ no padaahan dilo’, nga’ mongunsikou tokou kopio do upalai mantad parti ngaawi’ dilo’ do sumompuru GRS… Insya-allah, manahak tokou koponimbangan di poinpatut,” ka disio.
Kotolu-tolu Kumoduo Ponorikohon GRS kapaampai dii Datuk Seri Dr. Maximus Ongkili, po nogi’ Presiden PBS, Datuk Seri Dr. Jeffrey Kitingan (Presiden STAR), om i Datuk Seri Yong Teck Lee (Presiden SAPP), Luguan Monunurat GRS Datuk Seri Masidi Manjun, Luguan Kopointalangan Datuk Joniston Bangkuai, om Monobubut Tagayo Ardino Diris, wookon di nokotindapou.
