Dr. Joachim (koduo, wanan) pinapatahak baju korporat kumaa di Ponorikohon JPKK, Parwin Yudin.
RANAU: Soginumu’ do 170 puru kukumaraja’ momumuruan Lintuhun Koundangan Pogun (DUN) Kundasang minamaramit do toluod baju korporat.
Yolo’ nopo nga’ kapaampai do 85 tulun Ponorikohon Puruankuasa’ Komogoton om Koumoligan Kampung (JPKK) om 85 tulun Monunurat.
Toluod dilo’ pinotunui di Kumoduo Boyoon Montiri po nogi’ Puru Lintuhun Koundangan Pogun (ADUN) Kundasang, Datuk Dr. Joachim Gunsalam.
Dr. Joachim (tanga’) guminambar pongingitanan ontok tuminindapou ababayan walai poingukab id Surau As Sanusi, Kg. Togis.
Minongunsikou nogi’ isio kuminaa di Puru Parlimen P.179 Ranau, Datuk Jonathan Yassin i pinopotoluod po nogi’ do kogumuan baju korporat dilo’.
I Dr. Joachim pinapatahak toluod dilo’ kuminaa di Ponorikohon om Monunurat JPKK id ababayan walai poingukab Aidilfitri doid Surau As Sanusi do hiti, di tadau baino’.
Id ababayan dilo’, kikosiwatan i Dr. Joachim do monongkirumo di tongo’ mogigiyon kampung.
Nokotindapou po nogi’ i Monunurat Pulitik kumaa di Kumoduo Boyoon Montiri, Yubidi Gumpoyo; Luguan Piormutan om Upisor Piromutan Parlimen, Benedict Gunda om i Louis Sinti nogi’ i Upisor Piromutan Labus, Amilin Baranting; om i Lansanon Kopotundaan Mogigiyon, Dounis Sani.
Dr. Joachim monongkirumo miampai tongo’ mogigiyon kampung.
Lumansan i Dr. Joachim do toluod baju korporat diti kopongunsub sunduan diolo’ soira’ popoindalan karaja’ diolo’ sompoopori.
