PUTRAJAYA: Komontirian Kolidasan (KKM) pinoporuput 11 po kes varian Omicron id pomogunon diti ilo’ nopo nga’ koinsanai dilo’ kes ‘import’, kapaampai minhohombo mamasok Malaysia om songkosuayan mantad United Kingdom, Amerika Syarikat, Nigeria, Arab Saudi om Australia.
Tumanud do KKM, onom mantad kes varian Omicron diti noilaan id Kuala Lumpur, naamot id Selangor haro duo kes, Sarawak (2) om Perlis (1).
Tumanud do Utusan Malaysia, Luguan Potunud Kolidasan, Tan Sri Dr. Noor Hisham Abdullah minoboros, mantad ginumu’ dilo’, sopipoopori tolu kes mantad United Kingdom om Amerika Syarikat, sopipoopori duo kes mantad Nigeria om Arab Saudi om iso’ kes mantad Australia.
“Ilo’ nopo nga’ kopogompit do siam kes mamasok Malaysia naamot duo kes mamasok Nigeria. Haro walu’ kes kiharo tanda’, nga’ id gontob Kategori 2 om tolu kawagu kes aiso’ tanda’.
“Limo kes mindalan kuarantin id walai, naamot onom kes mindalan kuarantin id stisin kuarantin. Koinsanai kes diti masaan id ponoriukan potilombus montok mongintutun intodono kinorolihan om romut osomok,” ka disio id iso’ kointalangan habar di baino’.
Minoboros isio, 11 kes dilo’ noilaan soira’ pinoindalan poniisan kohondot 18 kes i kotumbayaan kikopikikiraan do varian Omicron miagal pinahabar di Montiri Kolidasan, Khairy Jamaluddin di ko 16tw Kohopod om Duo katatalib.
“Turu’ po sampel poingkuro po amu’ naanu pinopoimagon do varian Omicron sabab poniisan ‘jujukan genom’ poinponu’ amu’ naanu pinopoindalan sasabab no do gontob ‘viral load’ di osiriba’ id sampel ngaawi’ di naramit.
“Koturu’-turu’ sampel dilo’ noilaan kiharo gatang kitaran ambang (CT value) di akawas ilo’ nopo nga’ onom sampel miampai CT value katalib 30 om iso’ sampel kiharo CT value 28.47,” ka disio.
Daamot dilo’, minoboros i Dr. Noor Hisham, kinoilaan di 11 kes dilo’ nokoposili ginumu’ kumulatif kes import i pinomagon do varian Omicron nopo nga’ 13 kes, naamot di songkonihab Institut Ponolidikan Pongubatan (IMR) nga’ nokoilo do 13 po kes import nokopokito kopikikiraan do varian Omicron.
Ka disio, kootusan kopoimaganan mantad jujukan genom poinponu’ (WGS) masaan indadon om kointalangan potilombus kokomoi dilo’ poilaan kumaa ginumuan do po’ompus timpu.
Minongomi potilombus minoboros isio, soginumu’ 222 kes wagu varian i pinoruput mantad di 11tw Kohopod om Duo gisom ko 17tw Kohopod om Duo kapaampai do 128 kes wagu koinsanan dilo’ Varian of Concern (VoC) ilo’ nopo nga’ 117 varian Delta (B.1.617.2) om 11 varian Omicron (B.1.1.529) noilaan do IMR.
“Potilombus dino, Malaysian Genome & Vaccine Institute (MGI) nokopongintutun 48 kes wagu varian Delta (B.1.617.2) naamot, UKM Medical Molecular Biology Institute (UMBI) nokopongintutun 46 kes wagu i koinsanai dilo’ VoC ilo’ nopo nga’ varian Delta (B.1.617.2).
“Gisom baino’ diti, ginumu’ kumulatif kes i norolihan do virus SARS-CoV 2 i pinosompini’ sabaagi VoC om Varian of Interest (VoI) nopo nga’ soginumu’ do 5,213 kes. Mantad ginumu’ di noilaan dilo’, 5,193 kes nopo nga VoC naamot 20 kes nopo nga’ VoI,” ka disio pinopointalang.
Ka disio kawagu, miampai koinsanai, montok VoC haro 4,933 kes varian Delta, 233 kes varian Beta, 14 kes varian Alpha om 13 kes varian Omicron naamot montok kes ngaawi’ VoI, haro 13 kes varian Theta, apat kes varian Kappa om tolu kes varian Eta.
“Mantad do kinoinsawaton kes import varian Omicron id Malaysia diti, KKM minongingkawas po do ababayan kapanamangan om kopongilagan Covid-19 kaampai no varian Omicron id koinsanai Wawaya’an Sumuang Sompomogunan (PMA) om id nayatan mogigiyon.
“KKM mongunsub mooi do tikid tulun maganu dos penggalak vaksin Covid-19 mooi do gontob kopongumoligan di bobos akawas aanu monigampot do manalob kopogkorolihan tomporuruol Covid-19 id Malaysia. Tilombuson mananud norma wagu om kotonudan kumaa SOP di haro,” ka disio.
