Hajiji Haji Noor
KOTA KINABALU: Kopoinsingubasan pisompuruan, mongunsikou kopogisusuaian nopo nga’ hal kohunung id koponompuruan mogisusuai tinaru id pogun diti.
Boyoon Montiri, Datuk Seri Hajiji Haji Noor minoboros, sunduan pisompuruan di haro mantad okon nopo ko’ kiguno poluhubon do po’ompus nga’ nogi’ ingkawasan do potitikid timpu montok posuni sunduan mongupus pogun om pomogunon.
Kohondot dilo’ ka disio, koporintaan pogun Gabungan Rakyat Sabah (GRS) poposotol kopio do pisompuruan id kopotontuan pisompuruan om piisaan id nayatan kopogisusuaian tinaru id pogun diti kotilombus do ogompi’.
“Kiguno tokou tumilombus momogompi’ sunduan piuludan om piupakatan diti sabab ilo’ nopo nga’ posunduran ginaras tokou montok tumilombus poinpasi otoronong, oulud om koburu’,” ka disio.
Abidin (wanan) pinapatahak replika cek kuminaa di Puspanathan (gibang).
I Hajiji minoboros dilo’ id kinopoimaganan Ababayan Kapamaramaian Ramai Deepavali Nayatan Pogun Sabah doid Hotel Promenad, Kota Kinabalu, di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Ki’uhu do ‘Membudayakan Perpaduan, Maraikan Kepelbagaian’, ka di Hajiji, kohunung ilo’ id kopodolinan kinolumison id Sabah i nointutunan do piuludan mogigiyon orurukut tinaru om sinakagon.
“Ilo’ pogi’ id sunduk do kararamaian, okito tokou oinsanan tinaru mamaramai kararamaian toisoiso’ ramai kaampai do Tadau Deepavali, Tadau Agayo Aidilfitri, Karamaian Toun Wagu Sina’, Tadau Krismas om susuai po.
“Id sunduk Paganakan Malaysia, nubasanan piilangan om piupakatan kiguno tonudon, om okon ko’ id piilangan nopo do kararamaian, nga’ tikid nubasanan id koposion sangangadau tokou, mooi do kotoronongon om kaadangon pogun kotilombus ogirot om oulud sogigisom,” ka disio.
Minonongkounsikou nogi’ i Hajiji kumaa Komitikuasa’ Popoindalan Ababayan Kapamaramaian Ramai Deepavali Nayatan Pogun Sabah 2021, ilo’ nopo nga’ Koupisan Pisompuruan Pogun om Integrasi Nasional Pogun Sabah om Kotinanan Koubasanan Pogun Sabah nogi’ tongo’ koisaan mogigiyon India Sabah om Labuan sabab nakalantoi pinapaanjur do ababayan dilo’.
Id timpu di miagal, koporintaan pogun minokianu toinsanan bohogian do momoguno nubasanan wagu id tikid kopoonjuran ababayan mooi do pandemik Covid-19 kotilombus do popoinsiriba’ poompus timpu.
Id ababayan dilo’, pinapatahak nogi’ isio do replika cek mantad Koporintaan Pogun Sabah kuminaa mongongobi’ Kuil Subramaniar Lok Kawi, Leftenan Komander Puspanathan montok monginsonong om mongundar kuil dilo’.
Nokotindapou nogi’ i Mayor Dewan Bandaraya Kota Kinabalu, Datuk Noorliza Awang Alip, Ponorikohon Ramia Kapamaramaian Deepavali Nayatan Pogun Sabah, Datuk A. Nagaraju Applasamy, Monijor Tagayo Kotinanan Koubasanan Sabah, Mackey Apison om Kumoduo Potunud Pisompuruan Pogun om Integrasi Nasional.
