Dr. Joachim (wanan) monongkirumo dilo’ mogigiyon kampung miampai di Lansanon Kopotundaan Mogigiyon (PPM), Dounis Sany (tanga’).
RANAU: Mogisusuai pinggisoman pinoindalan id koposodiaan kosiwatan montok rayat monongkiromut miampai lalansanon.
Montok monumboyo’ angkab diti, Kelab Sipoot om Rekreasi (SRC) Ulu Sugut, Ranau pinapaanjur do ababayan miampai Kumoduo Boyoon Montiri po nogi’ Puru Lintuhun Koundangan Pogun (ADUN) Kundasang, Datuk Dr. Joachim Gunsalam, i winonsoi tumanud katatapan kooturan kopoindalanan pinatatap (SOP) id Balairaya Kampung Sinurai, di tadau baino’.
Dr. Joachim po nogi’ Montiri Kopotundaan Pomorunan (MID) minonongkounsikou kumaa ponorikohon manganganjur sabab ababayan sopiagal dilo’ kopoinggirot piromutan oulud id pialatan lalansanon om mogigiyon kampung.
Dr. Joachim (tolu, mantad gibang) pinapatahak toluod injin bot kumaa songulun mogigiyon kampung, di tadau baino’ id Balairaya kampung Sinurai.
Ka disio, kopotundaan kogogonopan om kogugunaan id koiyonon diti maan inggisamai montok manahak kosimbayanan kumaa komulakan nogi’ mogigiyon kampung.
Piromutan tosonong miampai koporintaan Pisompuruan id koiyonon koponguhup do pinggisoman papatahak kopotundaan do hiti, ka disio kawagu.
Minonongkounsikou nogi’ i Dr. Joachim kumaa Komontirian Komulakan om Sipoot, Koupisan Waig, Koupisan Pomutanaman om Pulis Diraja Malaysia (PDRM) Ranau i minanahak kopointalangan kumaa komulakan om mogigiyon kampung id ababayan diti.
Pinoposorou i Dr. Joachim kumaa toinsanan mogigiyon kampung do tumilombus mananud SOP di pinatantu’ sabab Ranau nokoposurat ginumu’ kinorolihan di kopotongob.
Dr. Joachim (tanga’) om i Jaminus (kolimo gibang) miampai do AJK Kelab Sipoot om Rekreasi (SRC) Ulu Sugut, Ranau.
Pinokianu disio oinsanan Komitikuasa’ Kopotundaan om Koumoligan Kampung (JPKK) do papatantu’ toinsanan mogigiyon kampung id pitamangan diolo’ sompoopori nokopomogonop vaksinasi, duo dos.
Minoboros nogi’ i Dr. Joahcim, JPKK unsubon do popotoguang upalai projik kopotundaan tokoro’ id kmapung miampai mitilombus kumaa Upisor Watas Ranau.
Naamot dilo’, Ponorikohon Manganganjur, Jaminus Agang minonongkounsikou mantad kinorikotan om tonggungan oinsanan bohogian.
Kelab rekreasi diti toririmo monokodung pinggisoman om katatapan do koporintaan, ka disio.
Id ababayan di miagal, pinapatahak o Dr. Joachim do toluod injin bot om tindikohon balairaya kumaa turu’ kampung ilo’ nopo nga’ Kampung Agan, Kg. Tundangon, Kg. Meridi, Kg. Pinitudaan, Kg. Tinaum, Kg. Mengkapoh om Kg. Kotog nogi’ songinan sikul, Sikul Kabansaan Gusi.
Nokotindapou nogi’ i Monobubut kumaa Puru Parlimen Ranau, Louis Sinti; Monunurat Pulitik kumaa di Dr. Joachim Gunsalam, Yubidi Gumpoyo; Lansanon Kopotundaan Mogigiyon, Dounis Sany; mobi’ Luguan Pulis Watas Ranau, ASP Helvin Ribus; Monguhup Monunurat Totuo Komontirian Komulakan om Sipoot, Muazad Shahrom Muhasif; Ponorikohon SRC, Razif Kasim; Kuut Tanak Mamasok Pogun (MAN) om Mobi’ Luguan Tanak Mamasok Pogun (WKAN) Ranau; JPKK, molohingon kampung, tongo’ popoburu’ mukim nogi’ koinsanai lalansanon kotinanan poinrojistor om luguan koupisan pogun om Pisompuruan.
