Joniston (gibang) ontok pituubungan miampai RTM Selamat Pagi Malaysia
KUALA LUMPUR: Ginaras do ponombuluyan pogun Sabah okon ko’ id kinopuawangon nopo do sandad pososorili’ dau nga’ nogi’ mogigiyon di orurukut om ‘unik’.
Monguhup Montiri Ponombuluyan, Koubasanan om Sandad Posorili’, Datuk Joniston Bangkuai minoboros, sinuau tulun Sabah i kapaampai do mogisusuai tinaru nosili pongimbayat do tutumombului rumikot id pogun dilo’.
“Pasanganu tokou do 40 ponit tinaru om lobi 200 tinimungan sub-etnik miampai boros, koubasanan om adat kinoubasanan diolo’ di poinpoopori.
Poimpasi yolo’ do otitimung id koyuon di oulud om tantu’ no dilo’ do kopongimbayat,” ka disio.
Joniston po nogi’ Ponorikohon Kotinanan Ponombuluyan Sabah (STB) minoboros dilo’ id pinituubungan miampai do RTM Selamat Pagi Malaysia karait ponombuluyan labus kakadayan mimpau do mogigiyon di konihab.
Minoboros isio, koisaan om kinosuahon mogigiyon pogun Sabah nga’ okito nogi’ id watas labus kakadayan, hinomob do mogigiyon misokodung popoburu’ kampung diolo’ sompoopori miampai popoindalan ababayan ponombuluyan.
Ka disio kawagu, ponombuluyan mimpau mogigiyon (komuniti) dilo’ okito kapanahak tadon nindopuan wagu kumaa mogigiyon kampung.
“Konsep ponombuluyan diti nga’ kopongingkawas nogi’ do pisompuruan om pisokodungan mogigiyon nokoiyonon sabab mimang yolo’ do kalantoi id pinggisoman ponombuluyan.
“Nokopongukab nogi ilo’ do kosiwatan pakarajaan kumaa sukod wagu, om i bobos oponsol mongingkawas kopurimanan id koponondulian gompi’ sandad posorili’. Iti kapasaga’ tutumombului rumikot do mintong sondiri’ poingkuro mogigiyon kampung manamong kinoiyonon diolo’.
“Id Sabah, nointutunan tokou no do nulu om rahat di olumis. Nga’ butia ponombuluyan haro nogi’ id labus kakadayan om suai ko ilo’, mogigiyon orurukut nga’ koimbayat nogi’,” ka disio.
Pinosotol di Joniston do STB toririmo aparagat mongintutun produk ponombuluyan labus kakadayan om monguhup mogigiyon kampung mooi do toririmo poinsodia’ mamaramit tutumombului om manahak surupu karaja’ bobos osonong soira’ nokotoguang do tomporuruol.
