Edward Lingkapo
KOTA KINABALU: Koupisan Waig Pogun Sabah (JANS) pinapabalanja lobi RM500 sontoun montok pinopoindalan kopomutulan pangaba’ waig i pinooput do aiso’ kasagaan (haram) id poliliput pogun diti.
Tumanud do Utusan Malaysia, Potunud JANS, Ir. Edward Lingkapo minoboros, kopomutulan pongoputan waig aiso’ kasagaan dilo’ momoguno kos di akawas poingkuro po, kes kapanakahan waig kakal aantakan id koiyonon ‘otuong’ gisom do babaino’ diti.
Minoboros isio, JANS natagakan id pialatan onom gisom walu’ riong liter sangadau (mld) mantad no do kinapanakahan waig id watas diti, lolobi no id watas Sepanggar.
Gisom baino’ diti, onom koiyonon nointutunan popowonsoi kapanakahan waig id pososorili’ kakadayan tagayo diti om kogumuan koiyonon diti nopo nga’ watas setinggan i noiyon-iyon do modidikot songkosuayan aiso’ kasagaan (PATI).
“Sundung kopomutulan waig i pinooput do aiso’ kasagaan diti winonsoi nga’, mogigiyon id koiyonon dilo’ popooput kawagu ontok tadau di miagal. Amu’ tokou kaanu madtamog koiyonon dilo’ do 24 jam sabab koumoligan pakakaraja’ tokou kiguno onuan koposuulan.
“Kapamasangan paip aiso’ kasagaan diti haro i pooputon do wayar lotirik, soira’ sitaf tokou mumbal do momutul, oontok yolo’ do karan. Iti nosili hal i onuan koposuulan id koponoibahan kobolingkahangan kapanakahan pangaba’ waig,” ka disio id kapahabaran di tadau baino’.
Minoboros i Edward, kobolingkahangan kapanakahan waig diti naantakan id Sabah om nung intangan id Sandakan, kinatagakon waig gamagama’ pinanakau nopo nga’ kosigampot do intolu pilipat mantad kinatagakon waig id Kota Kinabalu.
Minoboros isio, JANS potoguang kobolingkahangan monoibau kapanakahan waig sabab koiyonon di nokogompit kogumuan dilo’ noiyon-iyon di tulun i aiso’ dokumen om id labus kaganaan kuasa’ JANS montok maganu laang kohondot PATI diti.
Minongomi potilombus, ka disio, nung aiso’ kapanakahan waig, walu’ riong liter waig dilo’ aanu papatahak kumaa koiyonon i babaino’ diti potoguang kobolingkahangan pangaba’ waig miagal doid University Utama Condominium (UUC), Telipok om University Condo Apartment (UUC), Sepanggar.
“Nung kobolingkahangan kapanakahan waig id koiyonon longkod kakadayan agayo diti osoibahan, kapangabaan waig lobi kosonong id goduduo watas pomuwalaian dilo’,” ka disio.
Id timpu diti, ginumu’ waig i paabaon kumaa longkod kakadayan agayo diti nokoingkuri’ do 30 pihatus ilo’ nop onga’ kuminaa do 164 riong liter sangadau nosusuhut kinopotundaan aparagat om kobolingkahangan kapanakahan waig id naantakan.
Kohondot dilo’, kapamansaian loji pongusapan waig (LRA) Telibong I om LRA Telibong II id Tamparuli i nakatantu’ opongo do wulan Ko’onom 2022 koponoibau kopomogunaan pangaba’ waig id watas diti.
“Soira’ ngoduduo loji diti opongo do pintangaan toun tiso’, kopomoruhang ilo’ do 80 riong liter sangadau montok kogunaan mogigiyon id kakadayan tagayo diti,” ka disio.
Suai ko ilo’ ka disio, JANS papapanau nogi’ kawagu kopongilaan waig aiso’ asil (NRW) montok mongintutun koiyonon i popowonsoi do kapanakahan waig om kobolingkahangan ngaawi’ di suai miagal do paip nababak.
