Joniston (gibang) om i Kiyoshi miniboros kokomoi pinggisoman mongimbayat lobi kogumu’ tutumombului Jepun kumaa Sabah id pinirubaan diolo’
KOTA KINABALU: Sabah kikosiwatan montok mongimbayat lobi kogumu’ tutumombului Jepun kumaa pogun dtii miampai pongimbayat ririkoton di koimbayat om kinolumison sandad posorili’.
Iti atalang di ontok kinotombuluyan kumoiso’ Potunud Karaja’ Biro Ponombuluyan Jepun (JBT) Malaysia, Kiyoshi Fujita, kumaa Sabah, hinombo do minamarayou isio kinolumison pogun diti.
Minoboros i Kiyoshi, Sabah nopo nga’ iso’ mantad totombuluion rubpuon id Malaysia id nayatan tulun Jepun om ogumu’ i tuminombului kuminaa pogun diti pogulu pandemik Covid-19.
“Iti nopo nga’ kinotombuluyan kumoiso’ ku kuminaa Sabah om nokotombului oku no pipiro koiyonon koimbayat i tantu’ no do kosili ointutunan miampai tulun Jepun.
“Noimbayat oku, om otumbayaan oku do tutumombului Jepun amu’ no koorod-orod do gumuli’ kumaa Sabah,” ka disio.
Di konihab, i Kiyohsi pinapaharo pinirubaan miampai di Ponorikohon Kotinanan Ponombuluyan Sabah (STB), Datuk Joniston Bangkuai montok pinopoilang pomusarahan disio kokomoi kosiwatan pogun diti montok mongimbayat tutumombului Jepun. Nokotindapou nogi’ i Luguan Upisor Pidagangan STB, Tay Shu Lan.
Id pinirubaan dilo’, pinosotol nogi’ disio kosuulon kiharo kooturan kopoindalanan pinatantu’ (SOP) di opidot id pomorunan ponombuluyan, om pinopointalang do koporintaan Jepun poinggirot kopio karait do hal dilo.
JTB tinuridong di toun 1912 om ilo’ nopo nga’ kotinanan ponombuluyan bobos agayo id Jepun. Ilo’ po nogi’ nga’ iso’ mantad kotinanan ponombuluyan bobos agayo id pomogunan.
I Kiyoshi sinili sabaagi Potunud Karaja’ JTB montok Malaysia pointonod di tulan Koduo 2021 om nokotombului isio doid Melaka, Langkawi om Kuala Lumpur.
Nokorikot isio id Kota Kinabalu di ko 13tw Kohopod om Iso’ montok kotombuluyan karaja’ apat tadau, hinombo do minooi isio tombului doid Pasar Minggu, Taman Tunku Abdul Rahman, Taman Mamamasi Lalang Lok Kawi, Taman Kinabalu, Kulam Waig Alasu’ Poring, Klias River Cruise, om longkod podtungongisan resort, o wookon.
Naamot dilo’, i Joniston otumbayaan do Sabah om Jepun kopiilang pomusarahan di miagal karait do ponombuluyan poinggompi’ om eko-ponombuluyan.
Minoboros isio, ponombuluyan labus kakadayan kosili ointutunan id nayatan tutumombului Jepun, hinombo do kaanu yolo’ popowonsoi ababayan “shinrin-yoku” toi “modju’ talun” – konsep i gunoon id Jepun montok mongunsub tulun ginumuan poposiwat timpu momuriman sandad om tongus di osonong.
“STB toririmo misokodung miampai tambalut tokou id Jepun montok popointutun Sabah sabaagi ririkoton pilion. Tantu’ no miampai pongukaban kawagu piwolitan sompomogunan do toun tiso’, amu’ tokou no koorod-orod do mamaramit korikotan kawagu tutumombului mantad pomogunan Jepun,” ka disio.
