Gordon (koduo, gibang) pinaparamit sakadai kuminaa di Sikolis (koduo, wanan) om io’ Francis Mojikon (gibang) dii Glen Gary Anthony (wanan) poingintong
PENAMPANG: Upis Watas papaanjur do ababayan pitabangan tagayo kapaampai 54 kokompungan tadau Ko’onom diti (ko 20tw Kohopod om Iso’).
Mitatabang Perdana dilo’ pinatantu’ do poimpuunon id Lintuhun Ambrose Dumpangol doid Kampung Koidupan, Tinduuzon, Sugud, do hiti ontok jam ko 7.30 kosuabon.
Armada Parti Pribumi Bersatu Malaysia (BERSATU) Bohogian Penampang momolohou do oinsanan mogigiyon, lolobi no komulakan umampai id ababayan dilo’.
Luguan Kopointalangan dilo’ i Gordon Horace Chin, minagangat dilo’ katalib pinapatahak toluod RM10,800 (RM200 montok sompoopori kampung di kaampai) mantad di Timbang Luguan Armada Kabansaan, Ceasar Mandela Malakun, po nogi’ Luguan Armada Bohogian Penampang kuminaa di Monguhup Upisor Watas Penampang, Stanley Sikolis id ababayan kinopointalangan do hiti.
I Gordon pinopolombus nogi’ do pason di Ceasar id ababayan dilo’, i minoboros do pitabangan momilangga’ dilo’ kosiwatan montok mongunsub do kopurimanan tonggungan om piisaan id nayatan mogigiyon om Armada Bohogian Penampang ounsikou do kogompit om koponguhup okon ko’ mantad sasabab do pulitik, nga’ mantad nopo do kinoupuson kumaa Penampang.
“Monongkounsikou tokou nogi’ kumaa toinsanan bohogian, NGOs, parti pulitik, sukarelawan om minsosongulun i minonguhup di nogompitan liyud id Penampang di pipiro tulan nakatalib, lolobi no i Boyoon Montiri, Datuk Seri Hajiji Haji Noor om koporintaan Pogun, i pinapatahak lobi RM1 riong kapaamapi do RM1,000 tusin montok tikid paganakan i noumpadanan om monuridong kawagu walai i naraag id kinaantakan liyud dilo’.
“Iti nopo nga’ kopokitanan atalang do i Boyoon Montiri tokou poingginawo do Penampang,” ka di Ceasar.
Naamot dilo’ i Sikolis minonongkounsikou kumaa Armada Bohogian Penampang om koinsanai lalansanon BERSATU Penampang kaampai no Srikandi Bohogian mantad no do koponguhupan po’ompus diolo’ kumaa pinggisoman do Upis Watas.
“Sakadai mantad lansanon komulakan tokou diti kounsikohan kopio om otumbayaan oku do kounsub iti do mogigiyon maganu bohogian id kopomorisian.
“Monongkounsikou oku nogi’ kumaa koporintaan Pogun, id sahau kopomuruanan di Boyoon Montiri, mantad kopomodulianan om sokodung disio kumaa mogigiyon Penampang,” ka di Sikolis.
