KOTA KINABALU: Sabah nokoporuput 500 kes wagu Covid-19 di tadau baino’, nokoinsawat 58 kes nung piadangon di konihab (442).
Montiri Koporintaan Nokoiyonon om Pomuwalaian, Datuk Seri Masidi Manjun minoboros, koyuon ‘yo-yo’ pikikiro kotilombus montok pipiro timpu.
Pinopoilo isio do gontob kopongorolihan Covid-19 toi R0 montok Sabah do noondo nopo nga’ 0.98.
“Di tadau baino’, Kota Kinabalu nokoguli’ nokoindikau koiyonon bobos takawas sabaagi momoruhang bobos ogumu’ miampai 99 kes wagu, noruhangan 57 kes nung pitopongon di pogulu diti.
“Poingkuro po, tumanud pinonorisidan kointalangan di tadau baino’, 95 mantad kes id Kota Kinabalu nopo nga’ kes pinorojistor nakatalib duo tadau toi lobi mantad kinoilaan kinootusan pinomorisaan.
4 no kes naantakan id watas Kota Kinabalu poompus timpu 24 jam di nakatalib,” ka di Masidi po nogi’ Mononomboros Covid-19 Sabah.
Ka disio, wookon watas suai i nokoposurat kinoinsawaton kes wagu nopo nga’ Tuaran, Penampang, Beaufort, Tenom om Kuala Penyu.
Ka disio kawagu, Kinabatangan nokoposurat kinoinsiribaon ginumu’ kes, ilo’ nopo nga’ -30. Aiso’ kes wagu id 4 watas, Telupid, Lahad Datu, Tongod om Kalabakan.
“Soginumu’ 224 (44.8%) mantad koinsanai 500 kes i nokoruput di tadau baino’ nopo nga’ kes i alaid nokorojistor 2 tadau toi lobi mantad kinoilaan kinootusan pinomorisaan. Lobi nopo, 276 kes (55.2%) nga’ kes ngaawi’ i naantakan poompus 24 jam di nakatalib.
“Lobi 98% mantad kes ngaawi’ di tadau baino’ nopo nga’ kes i komoyon do agaan, ilo’ nopo nga’ id kategori iso’ om kategori duo. Susumakit id kategori tolu nopo nga’ songulun no, tolu tulun id kategori apat om aiso’ susumakit id kategori limo.
Limo kawagu kes kakal id ponoriukan potilombus do Koupisan Kolidasan Pogun Sabah (JKNS),” ka disio.
Pinopoilo nogi’ i Masidi do pinonorisidan winonsoi do Institut Kolidasan Malaysia nokopokito dos pongunsub (Booster dose) nokopongingkawas kopongumoligan tinan mantad korolihan Covid-19.
“Oinsanan mogigiyon kiumur 40 toun toi lobi posorohon do insan po do maganu dos pongunsub 6 tulan katalib dos koduo montok Pfizer om 3 tulan katalib dos koduo Sinovac,” ka disio.
Ginumu’ kes tumanud watas:
Kota Kinabalu 99 (42)
Tuaran 70 (46)
Kota Belud 53 (54)
Ranau 48 (51)
Tenom 33 (26)
Papar 28 (21)
Penampang 24 (15)
Beaufort 21 (15)
Kota Marudu 19 (20)
Sandakan 15 (8)
Tawau 15 (8)
Kuala Penyu 14 (6)
Keningau 14 (18)
Kudat 10 (3)
Tambunan 9 (8)
Sipitang 7 ( 15)
Kinabatangan 6 (36)
Putatan 5 (15)
Beluran 3 (8)
Kunak 2 (3)
Nabawan 2 (0)
Pitas 2 (3)
Semporna 1 (2)
Telupid 0 (5)
Lahad Datu 0 (12)
Tongod 0 (2)
Kalabakan 0 (1)
(Numbur id bingkurung nopo nga’ ginumu’ kes di konihab – 14/11)
Kluster Wagu
Aiso’
