Tuliang di maso ginambit kawagu
Pertama Lapanji
PAPAR: Songulun mantad di limo tahanan mamasok Filipina i osuon do pulis soira’ minogidu’ mantad Depoh Tahanan Imigrisin Kimanis do hiti di ko 10tw Kohopod om Iso’ katatalib nagambit kawagu di konihab.
I Tuliang Madalani, 35, ginambit id Tisan Rahat Kampung Gusi di jam ko 3.15 sodopon konihab.
Luguan Pulis Watas Papar, DSP Batholomew Umpit i pinopoimagon dilo’ soira’ rinomut minoboros, apat kawagu tahanan i minogidu’ dilo’ masaan osuon, yolo’ nopo nga’ ii Nadzwin Usman, 24; Herman Bilau, 35; Husin Japar, 43; om i Pertama Lapanji, 40.
Ka disio, bohogian dau aparagat magasu duo notondosan i minogidu’ luminoyog id rahat, yolo’ nopo nga’ ii Pertama om songulun kawagu i amu’ po noilaan.
Gisom di tadau baino’, 10 mantad koinsanai 14 tahanan i minogidu’ dilo’ noihum om nagambit kawagu.
Tulun ginumuan i kiharo kointalangan kaanu momoromut Longkod Upis Pulis Watas (IPD) Papar id numbur 088-912222 om piromutan hotline 088-916064.
Di ko 10tw Kohopod om Iso’, soginumu’ 14 tahanan mamasok Filipina kiumur 23 gisom 43 toun minogidu’ miampai minongumpil do taap pagagawasan longkod tahanan dilo’ om minomutul do tansar id Longkod Tahanan Naamot, Depoh Tahanan Imigrisin Kimanis di jam ko 3.30 minsusuab.
