Shahelmey pinapatahak setifikit kinotonudan kumaa songulun tutumanud bingkil ‘Pendayaupayaan Komuniti’ Nayatan Pogun Sabah Toun 2021 om sinasi’ di Abdul Hamediee (gibang).
KARAMBUNAI: Pinggisoman po’ompus toinsanan bohogian nopo nga’ oponsol id koponoibahan kobolingkahangan pomogunaan dadah id pogun diti.
Montiri Kopotundaan Mogigiyon om Kasasanangan Rayat, Datuk Ir. Shahelmey Yahya minoboros, iti kaampai no mogigiyon nokoiyonon lolobi no id watas di akawas kopikikiraan (kawasan berisiko tinggi – KBT).
Pinointalang disio, KBT id Sabah nopo nga’ watas Kota Kinabalu, Keningau, Labuan om Tawau.
“Pisokodungan pogialatan koupisan nopo nga’ oponsol kopio montok monoibau hal nogi’ kobolingkahangan dadah kosuul no id pogun diti.
“KBT id Sabah nokosigampot no do gontob ‘stabilisasi’ om nokopokito kosodiaan do mogigiyon montok maganu laang potilombus id hal komogunaansala’ dadah om kasansalaon sosial,” ka disio.
I Shahelmey minoboros dilo’ ontok pinopoimagon Pinomupusan Ababayan Bingkil ‘Pendayaupayaan Komuniti’ Nayatan Pogun Sabah Toun 2021 doid Nexus Resort & Spa Karambunai pinaanjur do Kotinanan Anti Dadah Kebangsaan (AADK) di tadau baino’.
Nokotindapou nogi’ i Potunud AADK Sabah, Abdul Hamediee Ibrahim om Monunurat Eksekutif PEMADAM Sabah, Josie Ansilmus.
Nokopogulu, id ababayan dilo’, minoboros i Shahelmey, pinggisaman kopurimanan kiguno tilombuson montok mongingkawas kogoosan id nayatan mogigiyon nokoiyonon monoibau hal pomogunaansala’ dadah.
“AADK kitonggungan montok manahak pontudukan kopongilagan kumaa lalansanon mogigiyon, tambalut ponokiuhup om tambalut ‘pintar’ mooi do mogigiyon kaanu popoindalan ababayan, katatapan om susuai kosimbanon i poburuon do koporintaan montok mamagampot mogigiyon poingindai dadah,” ka disio pinopoitalang.
Soginumu’ 30 tutumanud minampai bingkil dilo’ i nakapaampai di kinoiyonon ngaawi’ KBT kaampai no mantad watas Kota Kinabalu, Keningau, Tawau om Watas Pisompuruan Labuan.
Bingkil tolu tadau nopo dilo’ nga’ montok mongingkawas piromutan pisokodungan pogialatan kotinanan poinggompit id kapantalaban pomogunaansala’ dadah id kinoiyonon sompoopori.
