KOTA KINABALU: Soginumu’ do 66.8% mantad di 497 kes wagu Covid-19 di konihab ’ nopo nga’ yolo’ i nokopomogonop do kinopongonuan vaksin.
Mononomboros Covid-19 Sabah, Datuk Seri Masidi Manjun minoboros, ginumu’ di akawas diti kopotongob sabab kopokito ilo’ do amu’ kopomodulian di kogumuan tulun i nogonop vaksin di kooturan kopoindalanan pinatantu’ (SOP).
“Kipomusarahan doti’ yolo’ do kabalan no yolo’ mantad korolihan virus soira’ nokopomogonop kinopongonuan vaksin,” ka disio.
Minoboros isio, miagal di sasaru’ do pasarahan, kinopongonuan vaksin amu’ kapanahak pongumoligan hatus pihatus mantad korolihan.
“Ilo’ nopo nga’ koponingolig no do tinan tokou mantad kotoguang waya’ kinorolihan di adalaan i momoguno kopongusapan id walai pongubatan om kapanamangan oulud.
“Otopot nopo nga’ amu’ yolo’ kabalan mantad orolihan. Vaksin mongumolig nopo di susumakit mantad waya’ adalaan kinorolihan Covid-19.
“Okito iti miampai 98% kes di tadau baino’ nopo nga’ susumakit no id kategori iso’ om duo i amu’ momoguno kopongubatan id walai pongusapan.
“Nga’ kiguno sorohon do amu’ mimud id nunu nopo kategori, sosongulun susumakit toririmo mogowit virus om kopogkoroliu di puru paganakan suai id walai,” ka di Masidi.
