Dr. Joachim (kotolu, wanan) pinapatahak replika cek koponguhupan misin om kakamot BAIKS kuminaa dilo songulun mongungusaha’ Kota Belud.
KOTA BELUD: Soginumu’ do 52 mongungusaha’ nakaramit misin pomonsoi takanon id sahau Ponguhupan Pomorunan Tokoro’ om Gonsuhatan Sabah (BAIKS) montok Kota Belud, i kigatang RM310,000, do hiti di baino’.
Kumoduo Boyoon Montiri, Datuk Dr. Joachim Gunsalam i pinapatahak ponguhupan dilo’, otumbayana do ponguhupan diti kapanahak koundaran om sunduan kumaa koinsanai mongungusaha’ i nakaramit pinonguhupan dilo’.
Pinokianu disio koinsanai mamaramit tumilombus minggisom popoburu’ pongindopuan sompoopori om papamanau tonggungan sabaagi posunduran kopotundaan mongungusaha’ id watas diti.
Dr. Joachim (tanga’) minintong sinusulap pokikitanan dangol winonsoi nokoiyonon.
“Miampai diti, koponguhup kou do koporintaan monuridong nubasanan kousahawanan om mongingkawas gontob koposion mogigiyon maya’ kogompitan id ababayan pongindopuan,” ka disio.
I Dr. Joachim po nogi’ Montiri Kopotundaan Pomorunan (MID) minoboros, pointonod di pogulu po, watas Kota Belud nopo nga’ wtas i nointutunan okon nopo ko’ susumakai kuda’ di abaal nga nogi’ mongungusaha’ di kiginoris mumang buru’.
Ka disio, okito iti id sunduk kopolobusan asil di ‘eksotik’ miagal do penjaram, sada’ liking, dangol, sada’ bilis, tinunturu’ om sopiagal dilo’.
“Mantad no diti, komontirian ku minanahak kopomodulianan om koposotolan kumaa watas diti mooi do asil diti aanu popoburu’ po id sinonong om ginumu’ suai ko’ popotunda’ asil nimbulayan ngaawi’ di suai.
“Kopiongoi do konsep ‘Iso’ Watas Iso’ Pomorunan’, Komontirian ku maya’ Kopotundaan Pomorunan om Ponolidikan (DIDR) pinoposotol do kopotundaan asil nimbulayan mimpau do intodonon nokoiyonon di haro montok mongimbulai asil kigatang noruhangan kaampai no asil mantad rahat, pomutanaman om talun.
“Kalansanan ponguhupan koporintaan diti i pinoindalan do komontirian maya’ DIDR koposili Kota Belud wookon watas i kopongimbulai lobi kogumu’ mongungusaha’ om kapalabus lobi kogumu’ asil di tosonong i korohian do tongo’ momomoli,” ka disio.
Nokotindapou nogi’ i Upisor Watas Kota Belud, Hajah Diyanah Abdullah; Potunud DIDR, Tseu Kei Yue; Kumoduo Monunurat Pointatap MID, Benedick Bisoni; Luguan Bohogian IKS, DIDR, Lofina Justin; Monguhup Upisor Watas (Kopotundaan) Kota Belud, Peter Jiton; om i Luguan Pulis Watas Kota Belud, Superintenden Sahimi Husin.
