Bung ontok minagahu bohogian id pinibahasan doid Dewan Rayat.
KOTA KINABALU: Norikot nodii timpu do koporintaan monorisid om potilombus dino momoruhang ginumu’ poruntukan kumaa tikid Puru Parlimen Koporintaan montok manakadai ababayan kopotundaan id watas di obian diolo’.
Puru Parlimen Kinabatangan, Datuk Seri Bung Mokrat Radin minoboros, poruntukan di poinsodia’ haro kikiro RM3.5 riong sontoun amu’ korungod montok manakadai kopomogunaan kopotundaan id toisoiso’ watas Parlimen nunu podi watas Parlimen i nobian agayo miagal do watas Parlimen Kinabatangan.
“Maan poiradan watas Parlimen Kinabatangan i nobian ku kiginayo kaagal do Pahang. Miampai poruntukan di pinatahak tantu’ no do amu’ kogonop manakadai projik kopotundaan i gunoon do rayat,” ka disio ontok minaganu bohogian id ababayan pinibahasan Bajet 2022 doid Dewan Rayat di kaawagu diti.
Tumanud di Bung, iti nga’ kaantob pinggisoman koporintaan montok poposimban kinoiyonon labus kakadayan lolobi no id Sabah.
Minoboros i Bung, tumanud di amu’ korungodan diti koporintaan pogun Sabah lumansna do koporintaan Pisompuruan momoruhang 10 pihatus mantad Bajet 2022 montok popoindalan projik kopotundaan id pogun dilo’, potilombus dino kopogowit lumabus mantad komosikinan.
“Poruntukan soginumu kikiro RM5 bilion tikid toun amu’ korungod montok popoburu’ pogun Sabah i kiharo ginayo lobi kagayo ko’ mantad Semenanjung,” ka disio.
I Bung po nogi’ Montiri Karaja’ Tagayo Sabah minoboros, nung piomungon o Sabah om Sarawak, olikupan o watas Semenanjung diti, kopokito songkuro ginayo do watas duo pogun diti, nga’ poruntukan dilo’ somok miagal di pogun ngaawi’ suai.
“Iti kopotongob kopio do rayat Sabah. Kohondot dilo’, pokionuon ku koporintaan mintong kawagu kopoikidan poruntukan do osorisid pialatan watas Semenanjung, watas Sabah om watas Sarawak,” ka disio.
Minanagur nogi’ isio do Komontirian Kopotundaan Labus Kakadayan (KPLB) i kakal amu’ nokoposodia’ kointalangan bank kohondot poruntukan om projik i masaan poindalan om maan poindalano’ id tikid Parlimen.
Ka di Bung, bank kointalangan gunoon montok mintong om mongilo waya’ kopotundaan atantu’.
“Nung aiso’ bank kointalangan, poingkuro do koilo waya’ ponginsomokan kopotundaan i pinolintuhun do koporintaan Longkod om Koporintaan Pogun,” ka disio.
Id pinibahasan dilo’, rinoitan nogi’ di Bung o poruntukan i pinosodia’ do koporintaan Pisompuruan om minokianu diti do patahakon kumaa koporintaan pogun montok popoindalan dilo’ sabab koporintaan pogun lobi karati di koiyononon (demografi) Sabah nogi’ koposuulan om kogugunaan rayat id nayatan guas.
Ka disio, nung Sabah onuan poruntukan, nga’ uludon do koporintaan Longkod, tantu’ no do pogun dilo’ amu’ kosili pogun di koburu’ om otunda’ miagal do Selangor om Pulau Pinang.
“Sabah kikosiwatan do potundaon nung koporintaan Pisompuruan ototopot orohian kokito kopotundaan di po’ompus id pogun diti,” ka disio.
