PETALING JAYA: Koyuon do kopongudutan id piromutan noilaan nokoinsawat 60 pihatus id suang timpu 10 toun nakatalib.
Tumanud do Utusan Malaysia, i Luguan Pulis Pogun Datuk Seri Acryl Sani Abdullah Sani minoboros, kinoinswaton pointonod di 2011 dilo’ nosusuhut di kinoburuon tiknologi wagu kaampai no media sosiol.
Ka disio, id sabalik do kogogonopan dilo’, haro wookon tulun aiso’ tinonggungan maganu kosiwatan miampai popowonsoi kopomusalaan pongudutan kaampai no maya’ do piromutan.
“Sindiket kopongudutan id piromutan nga’ okito nogi’ do nokoburu’ komilaan popoindalan mogisusuai ‘modus opendi’ montok mamangkala’ di imamangon gisom do kotoguang yolo’ korugian hinotusan noribu ringgit.
“Tumanud pinongintaban, soginumu’ do 8,997 kes nokopohompit kinorugian RM58 riong pinorikod id suang timpu onom wulan toun diti nung piadangon di 5,846 kes di 2020 miampai kinorugian RM41 riong,” ka disio id kapahabaran media katalib pinopoimpuun Kimpin Kopongilagan Kopomusalaan Komersial (Kopomusalaan Suang Piromutan) 2021, doros hiti di tadau baino’.
Nokotindapou nogi’ i Kumoduo Luguan Pulis Pogun, Datuk Seri Mazlan Lazim om i Potunud Koupisan Ponoriukan Kopomusalaan Komersial (JSJK) Bukit Aman, Datuk Mohd Kamarudin Md. Din.
Minongomi kotilombus, ka di Acryl Sani, poompus timpu dilo’, haro ogumu’ tulun i nokoimamang do sindiket pongudutan nokotoguang kinorugian okoro’ nga’ mau’ minooi ruput doid pulis.
“Haro tulun id labus dilo’ i naakalan do sindiket pongudutan nga’ amu’ minomonsoi ruputan pulis sabab kopuriman do ginumu’ kinorugian diolo’ nopo nga’ okoro’.
“Kointalangan mantad ruputan pulis i winonsoi id tikid kes nopo nga’ oponsol montok mongulud do kointalangan ‘laman semakmule’ montok mongintuutn nung akaun bank dilo’ otopot toi amu’.
“Kohondot dilo’, tikid tulun i naakalan kiguno mooi ruput doid pulis montok papasaga’ ponoriukan potilombus aanu popoindalan,” ka disio.
