KOTA KINABALU: Sabah nokoporikod 364 kes wagu Covid-19 di tadau baino’, nokoinsiriba’ 41 kes nung piadangon di konihab (405).
Montiri Koporintaan Nokoiyonon om Pomuwalaian, Datuk Seri Masidi Manjun minoboros, pihotusan kes ngaawi’ wagu naanu maya’ pinomorisaan kitanda’ di tadau baino’ kakal do akawas id gontob 38.3% mantad tintob kes koinsanai.
Ka disio, kes ngaawi’ bohogian diti asaru’ pisowiton di amu’ kinotonudan do kooturan kopoindalanan pinatantu’ (SOP) kosuul no di maso mogititimung toi id tanga’ ginumuan.
“Okito iti maya’ kinoilaan mantad di kluster ngaawi’ wagu i montoroinsan do koimbulai. Kalansanan kopio mooi do oinsanan mogigiyon momoduli’ kogunoon mananud koinsanai SOP dadamot do Sabah lumaang kumaa Fasa 4 Palan Ponondulian Pogun (PPN),” ka di Masidi po nogi’ Mononomboros Covid-19 Sabah.
Mantad di 364 kes baino’, ka disio, 98% nopo nga’ susumakit id kategori iso’ om duo.
Ka disio kawagu, haro duo no tulun susumakit id kategori tolu, nogi’ 2 tulun id kategori apat om songulun id kategori limo.
Tolu kawagu kes kakal id ponoriukan potilombus do Koupisan Kolidasan Pogun Sabah (JKNS).
Soginumu’ do 96.25 mantad ginumu’ susumakit di tadau baino’ nopo nga’ mamasok Malaysia.
Ginumu’ kes tumanud watas:
Kota Kinabalu 78 (52)
Tuaran 42 (36)
Kota Belud 33 (22)
Tawau 30 (5)
Tenom 26 (19)
Penampang 18 (34)
Ranau 18 (37)
Kota Marudu 17 (29)
Tambunan 15 (18)
Keningau 14 (19)
Beaufort 14 (17)
Putatan 13 (2)
Papar 11 (19)
Sandakan 9 (16)
Tongod 7 (0)
Nabawan 4 (1)
Lahad Datu 3 (12)
Kudat 3 (9)
Kuala Penyu 2 (3)
Telupid 2 (16)
Beluran 1 (14)
Kinabatangan 1 (2)
Sipitang 1 (9)
Pitas 1 (10)
Kalabakan 1 ( 0)
Semporna 0 (4)
Kunak 0 (0)
(Numbur id bingkurung nopo nga’ tintob kes di konihab– 07/11)
Kluster Wagu
Aiso’
