Hajiji: Koporintaan Pogun lumansan mooi do lobi kogumu’ kimpin pohoroon montok mongingkawas kopurimanan kokomoi bato kabang id Sabah.
KOTA KINABALU: Kikiro 17.4 pihatus susumakit i noilaan kitoruol bato kabang id Malaysia nopo nga’ mantad Sabah.
I Boyoon Montiri, Datuk Seri Hajiji Haji Noor minoboros, tintob dilo’ naanu mantad pinomorisaan bato kabang di toun 2020 maya’ Ababayan Kolidasan Nipo’ Komontirian Kolidasan Malaysia.
Ka disio, sundung pihotusan dilo’ okito okoro’, nga’ amu ilo’ aanu intangan poinggaan do rayat.
“Mantad di 2,771 susumakit i pinorisa’ di toun 2020 id Sabah, soginumu’ do 5,420 tulun kiharo koubasan akawas kaantakan bato kabang, ilo’ nopo nga’ kopogonuan sigup, daing om nogi’ kopongonuan alkohol id poindala’.
“Suai mantad dilo’, kikiro no do 50 pihatus rayat Malaysia kopuriman do kopongonuan alkohol om moginggat kopoinsawat do ‘risiko’ diolo’ montok kaanu bato kabang. Kohondot dilo’ oponsol kopio montok momonsoi pomorisaan tosopung id klinik nipo’ nung oilaan do haro tanda’-tanda’,” ka disio.
Minoboros isio dilo’ ontok pinopoimagon Minggu’ Kopurimanan Bato Kabang 2021 Nayatan Pogun Sabah ki’uhu #JomCheckMulut maya’ piromutan do hiti, di tadau baino’.
Minggu’ Kopurimanan Bato Kabang do toun diti pohoroon solinaid sominggu’ mimpuun ko 7 gisom ko 13tw Kohopod om Iso’ id poliliput Malaysia.
Ka di Hajiji, pinonorisidan winonsoi doid nayatan rayat Malaysia nokoilo do koubasan moginggat kopoingkawas risiko bato kabang soginumu’ do inggonom pilipat nung piadangon diolo’ i amu’ noubas dilo’, naamot kinoubasan do kototolu nubasanan diti potilombus dino kopoinsawat risiko kaanu bato kabang do 22 pilipat.
“Kopotongob kopio, kopurimanan kohondot kinoubasan dilo’ nopo nga’ osiriba’,” ka disio kawagu.
Id Malaysia, ka disio, kogumuan kes bato kabang noilaan id nayatan di nakalaid, miampai lobi 60 pihatus noilaan id ‘advance stages’ toi nayatan potilombus, ‘stage III (tolu) om IV (apat).
Tumanud disio, wookon hal i koowit kopio do kopongilaan di alaid nga’ kinokurion kopurimanan kokomoi koponsolon pomorisaan om kopongilaan tosopung id nayatan rayat doid pomogunon diti.
Minoboros isio, sundung bato kabang kapanahak waya’ di araat kopio kumaa susumakit, nga’ otopot nopo bato kabang aanu mongilag.
“Kohondot dilo’, koporintaan pogun lumansan mooi do lobi kogumu’ kimpin pohoroon montok popoingkawas kopurimanan id nayatan rayat doid pogun diti.
“Kalansanan ku nogi’ o ababayan ‘turun padang’ montok momonsoi pomorisaan tosopung kopongilaan bato kabang om kimpin kopurimanan diti maan poinggoyoo’ gisom doid poonsokid pogun diti,” ka disio kawagu.
Karait diti Minggu’ Kopurimanan Bato Kabang 2021, ka id Hajiji, kimpin dilo’ okon nopo ko’ poindalanon id koinsanai kolinik nipo’ koporintaan id poliliput pogun, nga nogi’ kapaampai do kotonudan kolinik nipo’ swasta om univositi.
“Koporintaan pogun mongunsikou kopio pinggisoman winonsoi do Komontirian Kolidasan montok mongingkawas kopurimanan bato kabang id nayatan rayat.
“Kanou tokou no toinsanan maganu kopomodulianan diti tomporuruol bato kabang miampai maganu pomorisaan tosopung om mongilag do hal ngaawi’ i koowit kumaa kaantakan tomporuruol diti.
“Pinggisoman montok monguhup om monokodung susumakit id pamanahan sumahap bato kabang nga’ kiguno ingkawasan mooi do yolo’ om paganakan kopuriman do kopoison di lobi kounsikou soira’ do kaanu ‘diagnosa’ bato,” ka disio.
