Hajiji miampai tongo’ mamaramit gaa’ kopihondot kinapamaramaian Tadau Komulakan 2021 Nayatan Pogun Sabah.
KOTA KINABALU: Koporintaan Pogun popointutun pipiro pinggisoman wagu i poposuul do kopotundaan ‘modal insan’ kapaampai do komulakan, id Bajet Sabah 2022 i pawaladon do ko 3tw Kohopod om Duo diti.
Boyoon Montiri Datuk Seri Hajiji Haji Noor minoboros, wookon nopo do pinggisoman i kapaampai kopotundaan kapagarasan pingludaan komilaan id kaganaan tiknologi, teknikal om pidagangan maya’ Koupisan Kopotundaan Intodonon Tulun (JPSM).
“Koporintaan Pogun toririmo minggisom do monginsonong om mongingkawas waya’ karalano’ nogi’ ponginsomokan id inggisoman i poposuul do kopotundaan modal insan doid nayatan komulakan id pogun diti.
“Toririmo tokou poingukab do mokinongou angkab sukod wagu id pogun diti. Mantad no do hal dilo’, id Bajet Sabah 2022 i pawaladon do ko 3tw Kohopod om Duo diti, popointutun tokou pipiro pinggisoman wagu i pinalan miampai tuminanud atag om pomusarahan tinimungan porikotan maya’ mogisusuai karalano’ kopogompitan di minaan poindalano’.
Hajiji suminain “Longest Nonstop Virtual Talent Broadcasting Malaysia Book of Records” kopihondot kinapamaramaian Tadau Komulakan 2021 Nayatan Pogun Sabah.
“Sabaagi Luguan Koporintaan id nayatan pogun, agayo kalansanan ku mooi do tinimungan komulakan kaanu tumonggoi do koporintaan papalantoi koinsanai pamalanan montok no mamagampot Hontolon Sabah Maju Jaya,” ka disio ontok pinopoimagon kapamaramaian Tadau Komulakan Nayatan Pogun Sabah 2021 i pinaanjur id Longkod Konvensyen Sompomogunan Sabah (SICC) do hiti di konihab.
Lumansan nogi’ i Hajiji do atag kopoindalanan Ababayan Inkubator Kopomuruanan Komulakan Sabah (IkeBS) aanu do silihon sabaagi iso’ ababayan kopotundaan modal insan id nayatan komulakan doid pogun diti.
“Oimbayat oku kopio di atag kopoindalanan IkeBS i pinalan miampai do Komontirian Komulakan om Sipoot Sabah om Kounsol Komulakan Sabah.
Kalansanan ku kopoindalanan ababayan ponolimpuun diti opiantangan kopio,” ka disio i minoboros do koporintaan monguhup tinimungan mongungusaha’ komulakan kokusaian om koonduan i noumpadanan mitilombus do pandemik Covid-19 maya’ skim ponguhupan kousinan pinotomod.
I Luguan Montiri minoboros, koporintaan pogun nga’ popointutun nogi’ do Ababayan ‘Felo Belia Felo Sabah Maju Jaya’ (Felo SMJ), sabaagi iso mantad ralan montok manahak kapabantaan om koponuridongan kosiwatan nogi’ kotigulaion do komulakan id pogun diti.
Hajiji pinopotunui gaa’ kuminaa Koisaan Barisan Transformasi Belia Semporna (PBTBS) i nosili botnugan montok boogian Kotinanan Komulakan i nobian di ponorikohon dilo’, Yusof Abdul Kassim.
“Ababayan diti kihontolon montok manahak kosiwatan kumaa komulakan di nopili’ maya’ pinomilian kosudongan do karamit kapangahakan mitilombus mantad montiri om surupukaraja’ bobos akawas komontirian nogi’ komponi poinggompit koporintaan (GLC) id pogun diti.
“Maya’ do ababayan diti, Felo Belia SMJ poiyonon sabaagi mingluluda’ id kotinanan koporintaan om GLC solinaid sontoun montok maganu kopoilaan koyuyuon karaja kaampai no kopohompit do kopoindalanan sosonginan komontirian om GLC.
“Ababayan diti mimpuun do tulan Koiso’ 2022 id sahau kopoindalanan Komontirian Komulakan om Sipoot Sabah miampai do Sekretariat Hontolon Sabah Maju Jaya, Institut Pisokodungan Koporintaan om Rakyat (IKRAR) om Kounsol Komulakan Sabah.
Kalansanan ku komulakan do monongkiahou kosiwatan diti montok momoruhang toilailaan i koponoluod nogi’ miampai mitilombus kumaa kopotundaan pogun om pomogunon,” ka di Hajiji.
Id hal di poinggompit, minoboros i Hajiji, koporintaan pogun manahak sokodung poinponu’ kumaa pinggisoman koporintaan Pisompuruan id kopoindalanan Ababayan Jaringan Digital Nasional (JENDELA).
“Gisom doondo diti, soginumu’ 78 menara telekomunikasi nopongo minomonsoi om soginumu’ do 510 po i kakal id koponuridongan montok mongingkawas gulampot 4G id pogun diti soginumu’ 90 pihatus.
Montok monginsonong koiyonon di poinharo mantad nopo, soginumu’ do 2,196 kinoiyonon i nopongo minonginsonong kumaa 4 G mantad di 3,500 koiyonon i napalan.
“Montok monginsonong do premis kumaa kogompoton ‘gentian optik’ nopo, soginumu’ do 103,281 premis i nopongo pinopoindalan mantad di 251,165 premis di napalan.
Naangayan diti pikikiro koingkawas dumontol koompokon toun 2021 om potilombus dino ontok toun 2022,” ka disio.
Minoboros i Hajiji do koporintaan popoindalan koinsanai diti montok papatantu’ rayat kosuul no tinimungan susumikul om komulakan amu’ oiduanan id kinoburuon tiknologi kaawagu om kaanu piromutan poinponu’ kumaa kogogonopan om intodonon kopinsingilaan balajaran.
Nokotindapou nogi’ i Montiri Komulakan om Sipoot Sabah po nogi’ Ponorikohon Komitikuasa’ Takawas Tadau Komulakan Pogun Sabah 2021, Datuk Ellron Angin om i Monunurat Koporintaan Pogun, Datuk Seri Sr. Haji Safar Untong.
