KOTA KINABALU: Limo kusai tinahan do pulis tu’ minogiodu doid luan do Balai Pulis Luyang do hiti di tadau Ko’onom.
Koinsanai diolo’ i kiumur 26 gisom 29 toun tinahan soira’ amu’ minumboyo’ ponuhuan tinimungan pulis om tumilombus miodu di maso dilo’.
I Luguan Pulis Kota Kinablau, ACP Mohd Zaidi Abdullah i pinopoimagon do kinaantakan diti soira’ rinomut pinopoilo, mantad no do kinosurilogon diolo’ om montok manamong koumoligan, tinimungan pulis minaganu laang minanahan koinsanai kusai dilo’ mantad kasalaan kipogoyuon amu’ ooruoru id balai pulis.
“Mantad no do kinotiilon diolo’, amu’ tuminanud ponuhuan do tinimungan pulis nga’ tuminilombus do minogiodu nokoowit kagangahon id watas balai, tinahan yolo’,” ka disio.
Ka disio kawagu, id kinaantakan jam ko 8.40 totuong dilo’, songulun mantad di kusai dilo’ i kiumur 29 toun tuminangkus suminuang soira’ ginusa’ di apat kusai duai i kiumur 26 giosm 32 toun om numangan doid luan balai pulis dilo’.
Pinonoriukan tosopung nokoilo, kusai di numangan dilo’ minongoruhang sawo di songulun mantad minongumang kuminaa balai pulis montok minomonsoi ruputan do nuyung yau di sawo dau.
Ontok kinaantakan dilo’, sawo di minongumang masaan id kaunter ruputan ginumuan do manahak kopointalangan.
Koinsanai di notondosan noilaan do negatif dadah soira’ pinoindalan pomorisaan.
Id kinaantakan dilo’, aiso’ nunu-nunu kinosinduolan toi kinaraagon do harta di nokoruput do naantakan.
Kes soriukon id sahau Seksyen 90 Akta Pulis
